ދިވެހި ސަރުކާރުގެ އަމާޒަކީ ރާއްޖޭގެ މަސައްކަތްތެރިން އެދޭ ފަދަ އަމާން، އަބުރުވެރި، އަދި ރައްކާތެރި މަސައްކަތުގެ މާހައުލެއް ގާއިމުވެފައި އޮތްކަން ކަށަވަރު ކުރުން ކަމުގައި ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ބައިނަލްއަގުވާމީ މަސައްކަތްތެރިންގެ ދުވަސް ފާހަގަކުރުމުގެ ގޮތުން ހޯމް މިނިސްޓްރީން އިސްނަގައިގެން އެކި މުއައްސަސާތަކާ ގުޅިގެން މިއަދު މާލޭގައި ބޭއްވި ހިނގާލުން ނިންމާލުމަށް ރަސްފަންނު ސަރަހައްދުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު އިހުސާން ވިދާޅުވީ، މިއަހަރަކީ އިންޑަސްޓްރިއަލް ރިލޭޝަންގެ ގާނޫނާއި އޮކިއުޕޭޝަން ސޭފްޓީ އެންޑް ހެލްތުގެ ގާނޫނު ފުރިހަމައަށް ތަންފީޒުވެގެންދާނެ އަހަރެއް ކަމަށެވެ.
”ދިވެހި ސަރުކާރުގެ މިއަދުގެ އަމާޒަކީ ރާއްޖޭގެ މަސައްކަތްތެރިން އެދިވަޑައިގަންނަވާ ފަދަ އަމާން އަބުރުވެރި ރައްކާތެރި މަސައްކަތުގެ މާހައުލެއް ގާއިމުވެފައި އޮތްކަން ކަށަވަރު ކުރުން. އެކަމަށްޓަކައި ރާއްޖޭގައި ހެދިފައި ހުރި މަސައްކަތްތެރިންނާ ގުޅުން ހުރި ހުރިހާ ގަވައިދެއް ރަނުން ރަނަށް، އަކުރުން އަކުރަށް އަޅުގަނޑުމެން މި އަހަރު ތަންފީޒު ކުރަން ފަށާނަން،“ މިނިސްޓަރު ވިދާޅުވިއެވެ.
މީގެ އިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި އިރު، ލޭބާ ރިލޭޝަން އޮތޯރިޓީގައި އެތައް މައްސަލައެއް ފުނިޖެހިފައި އޮތްކަން ފާހަގަކުރައްވައި، އެ މައްސަލަތަކަށް އަމާނާތްތެރިކަމާއި އަދުލުވެރިކަމާއެކު ހައްލު ގެނެސްދެއްވާނެ ކަމުގެ ޔަގީންކަން މިނިސްޓަރު ދެއްވިއެވެ.
އިހުސާން އިތުރަށް ވިދާޅުވީ، މީގެ ކުރީ އަހަރުތަކުގައި މަސައްކަތްތެރިންގެ ދުވަސް ފާހަގަކުރަމުން އައީ ސަރުކާރާ ދެކޮޅަށް މަސައްކަތްކުރާ ރޫހެއްގައި ކަމަށްވިޔަސް، މިހާރުގެ ސަރުކާރުން ގެންގުޅެނީ މަސައްކަތްތެރިންގެ އަޑުއަހައި އެމީހުންނާ އެކު މަސައްކަތް ކުރުމުގެ ރޫހެއް ކަމަށެވެ. މަސައްކަތްތެރިންގެ ހައްގުތައް ނަގަހައްޓަން ޖެހޭ ވަރަށް ގިނަ ކަންކަން މީގެ ކުރިން އަތްދަށުން ދޫވެފައިވާކަން ގަބޫލުކުރައްވާ ކަމަށާއި، މަސައްކަތްތެރިންގެ ހައްގުތަކަށް އެދެވިގެންވާ ހައްލެއް ނުގެނެވެނީސް މަސައްކަތްތައް ހުއްޓާނުލައްވާނެ ކަމަށްވެސް މިނިސްޓަރު ވިދާޅުވިއެވެ.
މިއަދު ބޭއްވުނު މި ހިނގާލުމުގައި ގިނަ އަދަދެއްގެ މަސައްކަތްތެރިންނާއި ސަރުކާރުގެ އެކި މުއައްސަސާތަކުގެ ބޭފުޅުން ބައިވެރިވެވަޑައިގެންފައިވެއެވެ.
