މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޗެއާޕާސަން ހޮވުމަށް ބާއްވާ އިންތިޚާބު ފަސްކުރުމަށް ކުރެވެމުންދާ މަސައްކަތްތަކާ މެދު އެ ޕާޓީގެ އިސް މެންބަރު އަދި ރައްޔިތުންގެ މަޖިލީހުގެ މެންބަރު މީކާއިލް ނަސީމް ކަންބޮޑުވުން ފާޅުކުރައްވައިފިއެވެ.
މީކާއިލް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ޕާޓީގެ ޗެއާޕާސަން އިންތިޚާބު ލަސްކުރަން އުޅޭ އުޅުމަކީ އޭނާގެ އިތުރުން އެ ޕާޓީގެ އެއްވެސް އާންމު މެންބަރަކު ބަލައިގަންނާނެ ކަމެއް ނޫން ކަމަށެވެ. އިންތިޚާބުގެ ކަންކަން ކުރިއަށް ގެންދަންވާނީ ޕާޓީން ކުރިން އިއުލާނުކޮށްފައިވާ ރަސްމީ ތާވަލާ އެއްގޮތަށް ކަމަށް އޭނާ ބާރުއަޅުއްވައި ވިދާޅުވިއެވެ.
މީގެ އިތުރުން، ވަކި ބަޔަކަށް ނުވަތަ ވަކި ފަރާތްތަކަކަށް ފައިދާވާނެ ގޮތަކަށް އިންތިޚާބުގެ ތާރީޚާ ”ނުކުޅުއްވުމަށް“ މީކާއިލް ވަނީ ޕާޓީގެ އިސް ފަރާތްތަކަށް ގޮވާލައްވާފައެވެ. އޭނާ ވިދާޅުވި ގޮތުގައި އިންތިޚާބާ ގުޅޭގޮތުން ޕާޓީގެ ކަމާބެހޭ ކޮމިޓީން ނިންމާފައިވާ ނިންމުންތަކަށް ހުރިހާ ފަރާތްތަކަކުން ވެސް އިހްތިރާމް ކުރަންޖެހޭނެއެވެ.
ޕާޓީގެ ޗެއާޕާސަން އިންތިހާބު ލަސްކުރަން އުޅޭ އުޅުމަކީ އަޅުގަނޑުވެސް އަދި މިޕާޓީގެ އެއްވެސް މެންބަރެއްވެސް ބަލައިގަންނާނެ ކަމެއް ނޫން. ޕާޓީން އިއުލާނުކޮށްފައިވާ ތާވަލާ އެއްގޮތަށް އިންތިހާބު ކުރިއަށް ގެންދަންޖެހޭ. ވަކި ބަޔަކަށް ފައިދާވާގޮތަށް އިންތިހާބާ ނުކުޅުއްވާ، ކޮމިޓީއިން…
— Meekail Naseem (@MickailNaseem) May 1, 2026
އިންތިޚާބާ ގުޅޭގޮތުން އޭނާގެ ތައްޔާރީތަކަށް އަލިއަޅުއްވާލައްވަމުން މީކާއިލް ވިދާޅުވީ، އޭނާ އާއި އޭނާގެ ޓީމު މިހާރުވެސް ތިބީ އިންތިޚާބަށް ފުރިހަމައަށް ތައްޔާރުވެގެން ކަމަށެވެ.
އެމްޑީޕީގެ އެތެރޭގެ އިންތިޚާބާ ގުޅޭގޮތުން މިފަދަ ބަހުސްތަކެއް އުފެދިފައި މިވަނީ، އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބާއި އެ ޕާޓީގެ ގައުމީ މަޖިލީހުގެ އިންތިހާބު ބާއްވާނެ ފައިސާ ޕާޓީގައި ނެތް ކަމަށް ވިދާޅުވެ، އެ އިންތިހާބުތައް ރިޔާސީ ޕްރައިމަރީގެ ފަހުން ބޭއްވުމަށް އެ ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ހުށަހެޅުއްވުމާއި ގުޅިގެންނެވެ. މިމައްސަލައިގައި އެޕާޓީގެ ފަރާތުން ރަސްމީ ބަހެއް އަދި ލިބިފައެއް ނުވެއެވެ.
