ވޮޝިންގޓަން / ތެހެރާން – އެމެރިކާއާއި އީރާނާ ދެމެދު ވެފައިވާ ވަގުތީ ސުލްޙައިގެ އެއްބަސްވުން ރޫޅި، އަނެއްކާވެސް ހަނގުރާމައިގެ ބިރުވެރިކަން މެދުއިރުމައްޗަށް ފެތުރިއްޖެއެވެ. ވައިޓް ހައުސްގައި ބޭއްވި މުހިންމު ބައްދަލުވުމެއްގައި، އެމެރިކާގެ ސެންޓްރަލް ކޮމާންޑް (ސެންޓްކޮމް) ގެ ޑެޕިއުޓީ ކޮމާންޑަރު ވައިސް އެޑްމިރަލް ބްރެޑް ކޫޕަރ ވަނީ، އީރާނުގެ އަސްކަރީ ބާރުތައް އެއްކޮށް ނައްތާލުމަށްޓަކައި ދެވޭނެ ”ފައިނަލް ބްލޯ“ (އެންމެ ފަހުގެ ވަރުގަދަ ޙަމަލާތަކުގެ) ޕްލޭން ރައީސް ޑޮނަލްޑް ޓްރަމްޕަށް ހުށައަޅާފައިވެއެވެ.
މި ޚަބަރާއެކު، އީރާނުގެ ވެރިރަށް ތެހެރާނުގެ ވައިގެ ސަރަޙައްދުގައި އެމެރިކާގެ ޖާސޫސީ ޑްރޯންތަކެއް ޙަރަކާތްތެރިވާން ފެށުމުން، އީރާނުގެ ވައިގެ ދިފާޢީ ނިޒާމުތައް މަތީ އެލާޓަކަށް ގެނެސް ޙަމަލާދޭން ވަނީ ފަށާފައެވެ.
’ޑާކް އީގަލް‘ ހައިޕަރސޮނިކް މިސައިލް
ޕެންޓަގަންއިން ތައްޔާރުވަމުންދަނީ އެމެރިކާގެ އެންމެ ޒަމާނީ އަދި ނުރައްކާތެރި ހަތިޔާރު ކަމަށްވާ ”ޑާކް އީގަލް“ ހައިޕަރސޮނިކް މިސައިލް ބޭނުންކުރުމަށެވެ. މިއީ އަޑަށްވުރެ 5 ގުނަ ބާރަށް، 2,000 މޭލު ދުރަށް ސީދާ އަމާޒަށް ޙަމަލާދިނުމުގެ ޤާބިލުކަން ހުރި މިސައިލެކެވެ.
މީގެ އިތުރުން، ބޮޑެތި ޙަމަލާތައް ދިނުމަށް ބޭނުންކުރާ ބީ-1ބީ ލާންސަރ މަތިންދާބޯޓުތައްވެސް މިހާރު ވަނީ އެ ސަރަޙައްދަށް ޖަމާކޮށްފައެވެ. ސެންޓްކޮމްގެ ބްރީފިންގްގައިވާ ގޮތުން، ޓްރަމްޕް ބޭނުންވެއްޖެ ހިނދެއްގައި އީރާނުގެ ލީޑަރޝިޕާއި، ނިއުކްލިއަރ މަރުކަޒުތަކުގެ އިތުރުން އަސްކަރީ އިންފްރާސްޓްރަކްޗަރއަށް ކުރު މުއްދަތެއްގެ ތެރޭގައި ވަރުގަދަ ޙަމަލާތަކެއް ދީ އެއްކޮށް ސުންނާފަތިކޮށްލެވޭނެއެވެ.
ތެހެރާން މަތީ އެލާޓްގައި
އީރާނުގެ މީޑިއާތަކުން ރިޕޯޓުކުރާ ގޮތުގައި، ތެހެރާނުގެ ހުޅަނގު، މެދުތެރެ އަދި ދެކުނު ސަރަޙައްދުތަކުން ބާރުގަދަ އެންޓި-އެއަރކްރާފްޓް ބަޑީގެ އަޑުތައް ދަނީ މެދުނުކެނޑި އިވެމުންނެވެ. އީރާނުގެ އަސްކަރިއްޔާއިން ބުނަނީ އެއީ ކާކުކަން ނޭނގޭ ކުދި ޑްރޯންތަކަކަށް އަމާޒުކޮށް ދެމުންދާ ޙަމަލާތަކެއް ކަމަށެވެ. ނަމަވެސް، ވައިގެ ސަރަޙައްދު މިހާ ބޮޑަށް ބަލަހައްޓަން ފެށުމަކީ އެމެރިކާގެ ކުއްލި ޙަމަލާއަކަށް އީރާނުން ދުރާލާ ތައްޔާރުވަމުންދާކަމުގެ ސާފު ހެއްކެކެވެ.
ނާކާމިޔާބުވެފައިވާ ޑިޕްލޮމަސީ
މި ނުރައްކާތެރި ޙާލަތަށް ކަންކަން ގޮސްފައިމިވަނީ، ޕާކިސްތާނު މެދުވެރިވެގެން އިސްލާމްއާބާދުގައި މިދިޔަ އޭޕްރިލް 11-12 ގައި ބޭއްވި ސުލްޙައިގެ މަޝްވަރާތައް އެއްކޮށް ނާކާމިޔާބުވުމާ ގުޅިގެންނެވެ.
އީރާނުގެ ރައީސް މަސްޢޫދު ޕެޒެޝްކިއަން އިންޒާރު ދީފައިވަނީ، ސުލްޙައިގެ ވާހަކަތައް ދައްކަމުންވެސް އެމެރިކާއިން ކުއްލި ޙަމަލާއެއް ދީފާނެ ކަމަށެވެ. ދުނިޔޭގެ ތެލުގެ ބާޒާރުގެ އަގުތައް އިންތިހާއަށް އުފުލެމުންދާއިރު، އަދި ހުރްމުޒް ކަނޑުއޮޅީގައި ނުތަނަވަސްކަން އޮތްއިރު، ވަގުތީ ސުލްޙަ ނިމުމަކަށް އައިސް ”ފައިނަލް ބްލޯ“ ޙަމަލާތަކެއް ފެށުމުގެ ފުރުޞަތު މިހާރު މިވަނީ ވަރަށް ބޮޑުވެފައެވެ.
