އިލެކްޝަންސް ކޮމިޝަން (އީސީ) ގެ ރައީސްގެ މަޤާމުގައި ހުންނެވި މުޙައްމަދު ޒާހިދު، މިއަދުން ފެށިގެން އެ މަޤާމުންނާއި ކޮމިޝަނުގެ މެންބަރުކަމުން އިސްތިއުފާ ދެއްވައިފިއެވެ.
އިލެކްޝަންސް ކޮމިޝަނުން މިއަދު ބުނެފައިވަނީ، މިއަދުން ފެށިގެން އެ ކޮމިޝަނުގެ ރައީސްކަމާއި މެންބަރުކަމުން މުޙައްމަދު ޒާހިދު އިސްތިއުފާ ދެއްވިކަން އަންގަވާފައިވާ ކަމަށެވެ. ނަމަވެސް، އޭނާ މަޤާމުން އިސްތިއުފާ ދެއްވި ވަކި ސަބަބެއް ނުވަތަ މިކަމާ ގުޅޭ އިތުރު ތަފްސީލެއް އެ ކޮމިޝަނުން ހާމަކޮށްފައެއް ނުވެއެވެ.
މުޙައްމަދު ޒާހިދު އިލެކްޝަންސް ކޮމިޝަނުގެ މެންބަރުކަމަށް އައްޔަންކުރެއްވީ މިދިޔަ އަހަރުގެ ޖަނަވަރީ މަހުގެ ތެރޭގައެވެ. އޭނާ އެ ކޮމިޝަނުގެ ރައީސްކަމަށް އިންތިޚާބު ކުރެވުނީ އެ އަހަރުގެ ފެބްރުއަރީ މަހުގައެވެ. ކޮމިޝަނުގެ މެންބަރުކަމުގެ ފަސް އަހަރުގެ ދައުރުގެ ބޮޑުބައެއް ބާކީ އޮއްވައި، ކުއްލި ގޮތަކަށް އޭނާ މިއަދު އިސްތިއުފާ ދެއްވި ސަބަބެއް އަދި ސާފެއް ނުވެއެވެ.
ޤާނޫނުއަސާސީގައިވާ ގޮތުގެ މަތިން އިލެކްޝަންސް ކޮމިޝަނަށް މެންބަރުން އައްޔަންކުރައްވަނީ ރައްޔިތުންގެ މަޖިލީހުގެ ލަފަޔާއި ރުހުމާއެކު ރައީސުލްޖުމްހޫރިއްޔާއެވެ. ޒާހިދު އިސްތިއުފާ ދެއްވުމާ ގުޅިގެން، ހުސްވެފައިވާ އެ މަޤާމަށް މެންބަރަކު އައްޔަންކުރުމުގެ މަސައްކަތް ކުރިއަށް އޮތް ތަނުގައި ފެށިގެންދާނެއެވެ.
