އެމެރިކާ މެދުވެރިވެގެން އިޒްރޭލާއި ހެއްބޮއްލާ އާ ދެމެދު ވެފައިވާ ވަގުތީ އެއްބަސްވުމާ ޚިލާފަށް، އިޒްރޭލުން ދެކުނު ލުބުނާނަށް ދިން ވަރުގަދަ ޙަމަލާތަކެއްގައި މަދުވެގެން 9 މީހުން މަރާލައިފިއެވެ. ލުބުނާނުގެ ނޭޝަނަލް ނިއުސް އޭޖެންސީން ރިޕޯޓުކޮށްފައިވާ ގޮތުގައި މި ޙަމަލާތައް ދީފައިވަނީ އެއްބަސްވުމުގެ މުއްދަތު އިތުރު 3 ހަފްތާއަށް ދަންމާލާފައި ވަނިކޮށެވެ.
ޢާންމުން ދިރިއުޅޭ ސަރަޙައްދުތަކަށް ބޮމުގެ ޙަމަލާ
މި ޙަމަލާތަކުގައި އެންމެ ބޮޑު ގެއްލުމެއް ލިބުނީ ޢާންމުން ދިރިއުޅޭ ގެތަކަށެވެ. ޖެބްޗިޓް ސަރަޙައްދުގައި ދިރިއުޅޭ ޢިމާރާތަކަށް ދިން ޙަމަލާއެއްގައި 3 މީހުން މަރުވެ 7 މީހަކަށް އަނިޔާވިއެވެ. އަދި ޓޫލް ސަރަޙައްދުން 4 މީހުން މަރުވެ 6 މީހަކަށް އަނިޔާވިއިރު، ހާރޫފްގައި ގެޔަކަށް ދިން ޙަމަލާގައި 2 މީހުން ވަނީ މަރުވެފައެވެ.
މީގެ އިތުރުން ފާއިތުވި 24 ގަޑިއިރު ތެރޭގައި އިޒްރޭލުން ދިން ވައިގެ ޙަމަލާތަކުގައި 20 އަށްވުރެ ގިނަ މީހުން ޝަހީދުވެފައިވެއެވެ. އޭގެ ތެރޭގައި ދެ ޢާއިލާއެއް އެއްކޮށް ނެތިދިއުމާއި، ލުބުނާނު ސިފައިންގެ 2 މީހުންނާއި އަދި ޞިއްޙީ އެހީތެރިންގެ 3 މީހަކު ހިމެނެއެވެ. އަދި ކުޑަކުދިން ހިމެނޭހެން 70 އަށްވުރެ ގިނަ މީހުންނަށް ވަނީ އަނިޔާވެފައެވެ. ބޮމުގެ ޙަމަލާތަކުގެ އިތުރުން، ދެކުނު ލުބުނާނުގެ 15 އަވަށަކުން މީހުން ފޭބުމަށް އިޒްރޭލު ސިފައިން ވަނީ އިންޒާރުދީފައެވެ.
ޣައްޒާގެ ޙާލު ޖައްސާނަން“ ކަމުގެ އިންޒާރު
މި ޙަމަލާތައް ފެށިފައިމިވަނީ، ދެކުނު ލުބުނާނަށްވެސް ”ޣައްޒާއަށް ޖެހުނު ޙާލު ޖައްސާނަން“ ކަމަށް އިޒްރޭލުގެ ޑިފެންސް މިނިސްޓަރ އިސްރާއީލް ކާޓްޒް ދާދިފަހުން އިންޒާރުދީފައިވަނިކޮށެވެ.
ލުބުނާނުގެ ރައީސް ޖޯސެފް އޫން ވަނީ އިޒްރޭލުގެ މި ޢަމަލުތައް ހަރުކަށި އިބާރާތުން ކުށްވެރިކޮށްފައެވެ. އޭނާ ބުނީ، ޙަމަލާބަދަލުކުރުން ހުއްޓާލުމުގެ އެއްބަސްވުމެއް އޮއްވައިވެސް އިޒްރޭލުން ދަނީ ޢާންމުންގެ ގެތަކާއި އަޅުކަންކުރާ ތަންތަން ފުނޑުފުނޑުކުރަމުން ކަމަށެވެ. އަދި އިޒްރޭލުން ހިންގާ ޖަރީމާތައް ބެލުމަށް ބައިނަލްއަޤްވާމީ ކޮމިޓީއެއް އެކުލަވާލުމަށް ލުބުނާނުގެ ޤާނޫނުހަދާ މަޖިލީހުގެ ރައީސް ނަބީހް ބައްރީ ވަނީ ގޮވާލާފައެވެ.
މާރިޗު 2 ވަނަ ދުވަހު ފެށުނު މި ހަނގުރާމައިގައި އިޒްރޭލުގެ ޙަމަލާތަކުގައި ލުބުނާނުން މިހާތަނަށް 2,570 އަށްވުރެ ގިނަ މީހުން ވަނީ މަރާލާފައެވެ.
