ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަވަށްޓެރި ސްރީލަންކާއަށް އަންނަ އާދިއްތަ ދުވަހު ފައްޓަވާ ފުރަމާނަ ދަތުރުފުޅުގައި ހަތް އެއްބަސްވުމެއްގައި ސޮއިކުރައްވާނެ ކަމަށް ޗީފް ގަވަރުމަންޓް ސްޕޯކްސް ޕާސަން މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
ރައީސް އޮފީހުން ބުނި ގޮތުގައި ލަންކާގެ ރައީސް އަނޫރާ ކުމާރާ ޑިސަނާޔަކެގެ ދައުވަތަކަށް ރައީސް މުއިއްޒު ލަންކާއަށް ވަޑައިގަންނަވަނީ އަންނަ އާދިއްތަ ދުވަހު ކަމަށެވެ. އެ
ރައީސްގެ އެ ދަތުރުފުޅުގައި ލަންކާގެ އިސް މަސްއޫލުވެރީންނާ ބައްދަލުކުރައްވުމުގެ އިތުރުން ރާއްޖެއާއި ލަންކާއާ ދެމެދުގައި އޮތް ގާތް ގުޅުން އިތުރަށް ބަދަހިކުރުމާގުޅޭގޮތުން އެ ގައުމުގެ ރައީސާއެކު ރަސްމީ މަޝްވަރާތައް ކުރިއަށްގެންދެވުމަށް ހަމަޖައްސާފައިވާ ކަމަށް ރައީސް އޮފީހުން ބުނެފައިވެއެވެ.
ސްޕޯކްސް ޕާސަންގެ ފަރާތުން މީޑިއާތަކަށް މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި މުންދު ވިދާޅުވީ، ލަންކާ ދަތުރުފުޅަށް ފަހު ރައީސް އެނބުރި ރާއްޖެ ވަޑައިގަންނަވާނީ އަންނަ މަހުގެ 6 ވަނަ ދުވަހު ކަމަށެވެ.
”މަދުވެގެން ހަތް އެއްބަސްވުން މިހާރު އޮތް ގޮތުން ދެ ގައުމުގެ ދެމެދުގައި ސޮއިކުރެވޭނެ. މުހިންމު ދާއިރާތަކުން“ މުންދު ވިދާޅުވިއެވެ.
މުންދު ވިދާޅުވީ، އޭގެ ތެރޭގައި ޑިފެންސް، ހެލްތު، ޔޫތު، ފިޝަރީޒް ފަދަ ދާއިރާތައް ހިމެނޭ ކަމަށެވެ.
އެ ދަތުރުފުޅުގެ ލަންކާގެ ވިޔަފާރިވެރިންނާއި ދިވެހިން ގުޅުވައިދިނުމަށް އިންވެސްޓްމަންޓް ފޯރަމެއް ބާއްވާނެ ކަމަށްވެސް މުންދުވިދާޅުވިއެވެ.
