ފުލުހުންގެ މުއައްސަސާ ހަރުދަނާކުރުމަށް ހޯމް މިނިސްޓަރު ޢަލީ އިޙްސާން ކުރައްވާ މަސައްކަތް އިދިކޮޅު އެމްޑީޕީން ބަލައިގަންނަ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
މެންބަރު ޝުޖާއު މި މޭރުމުން ވިދާޅުވީ، އެކްސްގައި ހިއްސާކުރެއްވި ޕޯސްޓެއްގައެވެ. ޝުޖާއު ވިދާޅުވީ، ހޯމް މިނިސްޓަރު އިޙްސާނަށް އެމްޑީޕީން ތާއީދުކޮށް ވޯޓް ދެއްވުމުން ދިވެހި ފުލުހުންގެ މުއައްސަސާ ހަރުދަނާކޮށް އެ މުއައްސަސާއަށް ރައްޔިތުންގެ އިތުބާރު ހޯއްދަވައި ދެއްވުމަށާއި ބިދޭސީންގެ މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުންގެންދަވާ މަސައްކަތްޕުޅަށް އިދިކޮޅުގެ ތާއީދުއޮތްކަން ހާމަވާ ކަމަށެވެ.
ހޯމް މިނިސްޓަރ އަލީ އިޚްސާނަށް MDP ތާއީދުކޮށް ވޯޓް ދެއްވުމުން ދިވެހި ފުލުހުންގެ މުއައްސަސާ ހަރުދަނާކޮށް އެމުއައްސަސާއަށް ރައްޔިތުންގެ އިތުބާރު ހޯއްދަވައި ދެއްވުމަށާއި ބިދޭސީންގެ މައްސަލަތައް ހައްލުކުރެއްވުމަށް ރައީސް ޑރ @MMuizzu ކުރައްވަމުންގެންދަވާ މަސައްކަތްޕުޅަށް އިދިކޮޅުގެ…
— Ibrahim Shujau (@IbrahimShujaau) April 30, 2026
”އަޅުގަނޑު ގަބޫލު ކުރާގޮތުގައި މިފަދަ ހެޔޮވިސްނުން އެމްޑީޕީގެ މަޖިލިސް މެންބަރުންގެ ވިސްނުންފުޅަށް އައުމަކީ ސިޔާސީ ހަމަޖެހުމަށް ކޮންމެހެން މުހިންމު ކަމެއް، ސިޔާސީ މަސައްކަތުގައި މި ކޮލިޓީ ހުންނަންވާނެ،“ – ޝުޖާއު ވިދާޅުވިއެވެ.
ޝުޖާއު މި މޭރުމުން ވިދާޅުވެފައިވާއިރު ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 12 މެންބަރުންގެ ތެރެއިން އަށް މެންބަރަކު ވަނީ މިނިސްޓަރު އިޙްސާނަށް ރުހުން ދިނުމަށް ފެންނަ ކަމަށް ވޯޓުދީފައެވެ. އަނެއް ހަތަރު މެންބަރުން ވަނީ މިނިސްޓަރު އިޙްސާނަށް ރުހުންދޭން ނުފެންނަކަމަށް ވޯޓުދީފައެވެ.
ހޯމް މިނިސްޓަރު އިޙްސާނަށް ރުހުން ދިނުމަށް ފެންނަކަމަށް ވޯޓުދީފައިވާ އަށް މެންބަރުންނަކީ، ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް (ކުޑޫ)، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ (ގަޕޯ)، ކެންދޫ ދާއިރާގެ މެންބަރު މަޢުރޫފް ޛާކިރު، ތޮއްޑޫ ދާއިރާގެ މެންބަރު ޙުސައިން ސަމީރު، ކެޔޮދޫ ދާއިރާގެ މެންބަރު މުޙައްމަދު ނިއުޝާދު، މާވަށު ދާއިރާގެ މެންބަރު އަޙްމަދު ޝާކިރުގެ އިތުރުން މަރަދޫ ދާއިރާގެ މެންބަރު އަޙްމަދު ދީދީއެވެ.
