ގދ. ތިނަދޫގައި އިންޓަނޭޝަނަލް އެއާޕޯޓެއް ތަރައްގީކުރުމުގެ އެއްބަސްވުމެއްގައި މިރޭ ސޮއިކޮށްފިއެވެ.
ތިނަދޫގައި ރޭ ބޭއްވި ޖަލްސާގައި އެއާޕޯޓުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބެވެ.
މި މަސައްކަތް ހަވާލުކޮށްފައިވަނީ ތައިލެންޑުގެ ޕޭން ޕެސިފިކް ކުންފުންޏާއެވެ.
އިންފްރާސްޓްރަކްޗާ މިނިސްޓްރީ އިން ބުނުފައިވަނީ މި އެއާޕޯޓު މަޝްރޫއަށް 400-600 މިލިއަން ޑޮލަރު ކޮންޓްރެކްޓަރު އިންވެސްޓު ކުރާނެ ކަމަށެވެ.
ދައުލަތުގެ ބަޖެޓުން މި މަޝްރޫއަށް އެއްވެސް ފައިސާއެއް ހަރަދެއް ނުކުރާނެއެވެ. ތިނަދޫގައި އިންޓަނޭޝަނަލް އެއާޕޯޓެއް ތަރައްގީ ކުރަނީ އެންމެ ބޮޑެތި ބޯޓުތައް ޖެއްސޭ ވަރުގެ ރަންވޭއަކާ އެކުއެވެ.
ފްލައިން ސްކޫލެއްގެ އިތުރުން ކާގޯ ފެސިލިޓީ އާއި ފިއުލްފާމެއް އަދި އެއާކްރާފްޓުތައް ސާވިސްކުރާނެ އެމްއާރުއޯ ފެސިލިޓީ ވެސް އެ އެއާޕޯޓްގައި ގާއިމްކުރާނެއެވެ.
އެއާޕޯޓް ތަރައްގީކުރުމުގެ އިތުރުން ފަތުރުވެރިކަމުގެ މަޝްރޫއުތައް ވެސް އެ ކުންފުނިން ހިންގާނެއެވެ.
