މީސްތަކުންގެ އަބުރަކީ އިސްލާމްދީނުގައި ހުރުމަތްތެރިކުރައްވާފައިވާ އެއްޗެއް ކަމަށާއި އެހެންކަމުން ޤަޛުފުކުރުމަކީ އާދައިގެ ކަމެއްކަމަށް ދެކިގެން އެކަން ނުކުރުމަށް މަޝްހޫރު ދީނީ އިލްމުވެރިޔާ ޝަފީޢު ޢަބްދުﷲ ވިދާޅުވެއްޖެއެވެ.
ޝެއިޚް ޝަފީޢު މި މޭރުމުން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްތަށިފުޅުގައި ޒިނޭގެ ދޮގު ތުހުމަތު އަޅުވައި ”އަދަދު“ ނޫހުން ގެނެސްދިން ޑޮކިއުމެންޓްރީއާއި ގުޅިގެން އެކްސްގައި ހިއްސާކުރެއްވި ޕޯސްޓެއްގައެވެ. ޝެއިޚް ވިދާޅުވީ، އިސްލާމީ މުޖުތަމައެއްގައި ބޭނުންހައި އިރަކު ބޭނުންހައި ބައެއްގެ ބޮލުގައި ޒިނޭގެ ތުހުމަތު ނޭޅުވޭނެ ކަމަށާއި އެކަމަށް ކިޔަނީ ޤަަޛުފުކުރުން ކަމަށެވެ.
ޝެއިޚް ވިދާޅުވީ، މީހެއްގެ މައްޗަށް ޤަޛުފުކޮށްފިނަމަ އެކަމުގެ މައްޗަށް ހަތަރު ހެކިން ހުށަހަޅަންޖެހޭނެ ކަމަށެވެ. އެކަން ނުވެއްޖެނަމަ ޤަޛުފުގެ ހައްދު އެ މީހެއްގެ މައްޗަށް އަންނާނެކަން ފާހަގަކުރައްވައި ޝެއިޚް ވިދާޅުވީ އެފަދަ މީހެއްގެ ގައިގައި 80 އެތިފަހަރުން ހައްދުޖެހުމާއިއެކު އެ މީހެއްގެ ހެކިބަސް ޝަރުއީ ކޯޓުތަކުގައި ގަބޫލު ނުކުރެވޭނެ ކަމަށެވެ.
އަދި ތައުބާ ނުވާހާ ހިނދަކު އެފަދަ މީހަކީ ފާސިގެއް ކަމަށާއި އަދުލުވެރިއެއް ނޫން ކަމަށް ކަނޑައެޅިގެންދާނެ ކަމަށްވެސް ޝެއިޚް ވަނީ ވިދާޅުވެފައެވެ.
ޝެއިޚް އިތުރަށް ވިދާޅުވީ، އިސްލާމްދީނުގައި މި ހުރިހާ ކަމެއް މި ގޮތަށް ކަނޑައަޅުއްވާފައި އޮންނަނީ މީހުންގެ އަބުރާއި އިއްޒަތަކީ މާތްﷲ ހުރުމަތްތެރިކުރައްވައިފައިވާ އެއްޗަކަށް ވާތީ ކަމަށެވެ. އެހެންކަމުން ޤަޛުފުކުރުމަކީ ވަރަށް އާދައިގެ ކުޑަކަމެއް ކަމުގައި ދެކިގެން އެކަން ”ނޯމަލައިޒް“ ނުކުރުމަށް ޝެއިޚް ވަނީ އެދިވަޑައިގެންފައެވެ.
ޤަޛުފުކުރުމަކީ އިސްލާމްދީނުގައި ކަނޑައެޅިގެން ނަހީކުރައްވާފައިވާ، ހައްދު ކަނޑައެޅިފައިވާ ބޮޑު ފާފައެކެވެ. ނަމަވެސް މިހާރަކަށް އައިސް މިއީ ވަރަށް އާދައިގެ ކުޑަކަމެއް ކަމަށް ދެކިގެން ގިނަ ބަޔަކު އަންނަނީ މިކަން ކުރަމުންނެވެ.
