ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވެރިކަންކުރާ ޕީއެންސީގެ ފަރާތުން ވާދަކުރައްވާނީ އަޙްމަދު ސަޢީދު، ކަމަށް އެޕާޓީން ނިންމައިފިއެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވެރިކަންކުރާ ޕީއެންސީގެ ފަރާތުން ވާދަކުރައްވާނީ އަޙްމަދު ސަޢީދު، (ސޮޑާ) ކަމަށް އެޕާޓީން ނިންމައިފިއެވެ.
ޕީއެންސީން މިއަދު ކުރިއަށް ގެންދިޔަ ނޫސްވެރިންގެ ބައްދަލު ވުމުގައި ލީޑަރޝިޕުން ވަނީ މި ނިންމުން ނިންމެވިކަން ހާމަކުރައްވާފައެވެ.
އެޕާޓީގެ ނައިބު ރައީސް އަހުމަދު ޝިޔާމް ވިދާޅުވީ މިގޮތަށް ނިންމެވީ ސިނާންވެސް މިކަން އިއުލާނު ކުރައްވާފައިވުމާއެކު، އީސީން އިތުރު ކުރި މުއްދަތާއެކުވެސް އަލުން ޕްރައިމަރީއެއް ބާއްވާނެހާ ދުވަސް ނެތުމުން ކަމަށެވެ. އަދި ސައީދުވެސް މިކަމުގައި ކުރިއަށް ވަޑައިގެންނެވުމުގެ ވިސްނުން ހުރުމުން ކަމަށް ޝިޔާމް ވިދާޅުވިއެވެ.
މީގެ އިތުރުން ޝިޔާމް ވިދާޅުވީ ޕީއެންސީގެ ސަޕޯޓަރުންވެސް އެދެނީ ސައީދުއަށް ފުރުސަތު ދިނުމަށް ކަމަށާއި، އެއީ ޕާޓީއަށް މިވަގުތު އެގޮނޑި ކާމިޔާބު ކުރުމަށްޓަކާ އެންމެ ފައިދާހުރި ގޮތް ކަމުގައި ދެކިވަޑައިގަންނަވާ ކަމަށެވެ. އަދި މިކަމުގައި ސިނާންގެ ފުރިހަމަ ތާއީދާއި އެއްބާރުލުން ލިބިގެންދާނެ ކަމުގެ ޔަޤީންކަން ދެއްވާފައިވާކަން ޝިޔާމް ހާމަކުރެއްވިއެވެ.
މި އިންތިޚާބުގައި ޕާޓީގެ ޓިކެޓަށް އެދި ފޯމު ހުށަހެޅި 2 ފަރާތުގެ މެދުގައި މީގެކުރިން ވަނީ ޕްރައިމަރީއެއް ބާއްވާފައެވެ. އެއީ މުޙައްމަދު ސިނާނު، ހުޅުދޫއާގެ، ސ. ހިތަދޫ އަދި އަޙްމަދު ސަޢީދު، ބަލީލް، ސ. ހިތަދޫ އެވެ. މި ދެ ބޭފުޅުންގެ ތެރެއިން ޓިކެޓް ކާމިޔާބު ކުރެއްވީ އެދާއިރާ ކުރިންވެސް ތަމްސީލު ކުރެއްވި ސިނާނުއެވެ.
މި އިންތިހާބުގައި ސަޢީދުގެ މައްޗަށް ސިނާން ކުރި ހޯއްދެވީ އެންމެ 27 ވޯޓުގެ ތަފާތަކުންނެވެ. އެގޮތުން ސިނާނަށް 226 ވޯޓު ލިބިފައިވާއިރު ސަޢީދަށް ލިބިފައިވަނީ 199 ވޯޓެވެ. އިލެކްޝަން ކޮމިޝަނުން ހާމަކޮށްފައިވާ ގޮތުގައި އެ ފޮށިތަކަށް ވޯޓުލުމުގެ ހައްގު ލިބިގެންވަނީ ޖުމުލަ 727 މީހުންނަށެވެ.ޕީއެންސީން މިދިޔަ ހޮނިހިރު ދުވަހު ބޭއްވި އެ ދާއިރާގެ ބައި-އިލެކްޝަން ކާމިޔާބު ކުރީ ސިނާނެވެ.
ނަމަވެސް ސިނާން އާންމުކުރި ބަޔާނެއްގައި ވިދާޅުވީ، ފާއިތުވި ތިން ދުވަހު ދާއިރާގެ ވަރަށް ގިނަ އަދަދެއްގެ ރައްޔިތުންނާއެކު ގާތުން ކުރެވުނު މަޝްވަރާތަކާއެކު މިފަހަރު މިގޮނޑި ޕީއެންސީއަށް ކާމިޔާބުވާން އެންމެ ފަހި ވާނީ އޭނާ ފަހަތަށްޖެހި އެހެން އައު ބޭފުޅަކަށް ފުރުސަތު ދީގެން ކަމަށް ފެންނާތީ އެގޮތަށް ނިންމާފައިވާ ކަމަށެވެ.
ސިނާން ވިދާޅުވީ، އެ ނިންމުން ނިންމި ނަމަވެސް އެ ގޮނޑި ކާމިޔާބު ކުރުމަށްޓަކައި ޕީއެންސީން ނުކުންނަ ކެނޑިޑޭޓެއް އިންތިހާބު ކޮށްދިނުމަށް އޭނާ ފުރިހަމަ ބައިވެރިވުމާއި އޭނާގެ ފުރިހަމަ ދައުރު އެންމެ ފުޅާކޮށް އޮންނާނެ ކަމަށެވެ.
ސިނާން ގެ ނިންމެވުމަށްފަހު ޕީއެންސީގެ ފަރާތުން މިވަނީ މިކަން ރަސްމީކޮށް އިޢުލާނު ކުރައްވާފައެވެ.
