އަޒަރުބައިޖާނަށް ދަތުރުކުރާ ދިވެހިންނަށް މިއަދުން ފެށިގެން ވިސާއާ ނުލައި އެ ޤައުމަށް އެތެރެވުމުގެ އިންތިޒާމް ހަމަޖެހިފައިވާ ކަމަށް މިނިސްޓްރީ އޮފް ފޮރިން އެފެއާޒްއިން ހާމަކޮށްފިއެވެ.
ފޮރިން މިނިސްޓަރީން މިއަދު ނެރުނު ބަޔާނެއްގައި ވިދާޅުވީ، 24 ސެޕްޓެމްބަރ 2025 ގައި ދިވެހިރާއްޖެ އާއި އަޒަރުބައިޖާން އާ ދެމެދު ސޮއިކޮށްފައިވާ ވިސާ އެގްޒެމްޝަން އެއްބަސްވުމަށް މިއަދުން ފެށިގެން އަމަލުކުރަން ފަށާފައިވާ ކަމަށެވެ. މި އެއްބަސްވުމުގެ ދަށުން، އޯރޑިނަރީ ޕާސްޕޯޓް ގެންގުޅޭ ދިވެހިންނަށް އެއްވެސް ވިސާއަކާ ނުލައި 90 ދުވަހުގެ މުއްދަތަށް އަޒަރުބައިޖާންގައި މަޑުކުރެވޭނެއެވެ.
މީގެ އިތުރުން، 18 ޖޫން 2025 އިން ފެށިގެން ޑިޕްލޮމެޓިކް އަދި އޮފިޝަލް ޕާސްޕޯޓުތަކުގައި ވެސް ވިސާއާ ނުލައި އެ ޤައުމަށް ދަތުރުކުރެވޭ ގޮތަށް ދެ ޤައުމުގެ ދެމެދުގައި ވަނީ ކުރިން އެއްބަސްވެފައެވެ. ނަމަވެސް، ފޮރިން މިނިސްޓަރީން އިލްތިމާސްކުރައްވާ ގޮތުގައި، އަޒަރުބައިޖާންގައި ދިގު މުއްދަތަކަށް ތިބުމަށް ގަސްދުކުރާ ފަރާތްތަކާއި، ވަޒީފާ އަދާކުރުމަށް ނުވަތަ ތަޢުލީމް އުނގެނުމަށް ނުވަތަ ވިޔަފާރި ކުރުމަށް އެ ޤައުމަށް ދާ ފަރާތްތަކުން ދަތުރުކުރުމުގެ ކުރިން ކަނޑައެޅިފައިވާ ޚާއްޞަ ވިސާ ހޯދަންޖެހޭނެއެވެ.
މި އެއްބަސްވުމަށް ޢަމަލުކުރަން ފެށުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން، ދިވެހިންނަށް ދުނިޔޭގެ އެކި ޤައުމުތަކަށް ލުއިފަސޭހަކަމާއެކު ދަތުރުކުރެވޭނެ އިންތިޒާމް ހަމަޖެއްސުމަށް ކުރަމުންދާ މަސައްކަތަށް ލިބުނު ވަރަށް ބޮޑު ކާމިޔާބީއެއްގެ ގޮތުގައި ފޮރިން މިނިސްޓަރީން ސިފަކުރެއެވެ. މި ފުރުޞަތުގެ ސަބަބުން ދެ ޤައުމުގެ ދެމެދުގައި އޮންނަ ގުޅުން އިތުރަށް ބަދަހިވެ، ދަތުރުފަތުރުގެ ދާއިރާއިން ބޮޑެތި ލުއިތަކެއް ދިވެހި ރައްޔިތުންނަށް ލިބިގެންދާނެއެވެ.
