މި މަހުގެ ކުރީކޮޅު ސޫރިޔާގެ ރައީސް އަޙްމަދު އަލްޝަރާ ބުނެފައިވާ ގޮތުގައި އިޒްރޭލާއެކު ކުރެވެމުންދާ މަޝްވަރާތައް ”މެދުނުކެނޑި ކުރިއަށްދިޔަ“ ނަމަވެސް، ”ބޮޑެތި ހުރަސްތަކަކާ“ ވަނީ ކުރިމަތިވެފައެވެ. އެއީ ޚާއްޞަކޮށް ސޫރިޔާގެ ބިންތަކަށް އިޒްރޭލުން ވެރިވެގަނެގެން ތިބި މައްސަލައިގައެވެ. އަނަދޯލޫ އެޖެންސީއަށް ދީފައިވާ ބަޔާނެއްގައި އަލްޝަރާ ބުނެފައިވަނީ، ވާހަކަތައް އޮތީ މަޑުޖެހިފައެއް ނޫން ކަމަށެވެ. ނަމަވެސް ސޫރިޔާގެ ބިމުގައި އިޒްރޭލުން ތިބުމަށް ބާރުއަޅަމުންދާތީ، މި މަޝްވަރާތައް ކުރިއަށްދަނީ ވަރަށް ބޮޑެތި ދަތިތަކާއެކު ކަމަށް އޭނާ ފާހަގަކުރިއެވެ.
އޭނާ އިތުރަށް ބުނެފައިވަނީ، ސަރަޙައްދީ ހަމަޖެހުން ގާއިމުކުރުމަށާއި މަޝްރަހު ގޯސްވިޔަ ނުދިނުމަށްޓަކައި ”ކޮންމެވެސް ކަހަލަ ސަލާމަތީ އެއްބަސްވުމަކަށް“ ސޫރިޔާއިން ބޭނުންވާ ކަމަށެވެ. މި މަޝްވަރާތައް މި ކުރިއަށްދަނީ، ގިނަ އަހަރުތަކެއްގެ ދާޚިލީ ހަނގުރާމައަށްފަހު، ޤައުމު އަލުން ބިނާކުރުމަށާއި ސަރަޙައްދީ ޤައުމުތަކާ ގުޅުން ބަދަހިކުރުމަށް ސޫރިޔާއިން މަސައްކަތް ކުރަމުންދާ ދަނޑިވަޅެއްގައެވެ.
އޭނާ އިތުރަށް ބުނެފައިވާ ގޮތުގައި ސޫރިޔާގެ ސަރުކާރުން އެންމެ އިސްކަންދޭ މަގަކީ ޑިޕްލޮމަސީ ނުވަތަ ވާހަކަދައްކައިގެން މައްސަލަ ހައްލުކުރުމެވެ. އަދި ހަމަނުޖެހުންތައް ކުޑަކުރުމަށް ކުރެވޭ މަސައްކަތްތަކަށް އެހީތެރިވުމަށް ބައިނަލްއަޤުވާމީ ފަރާތްތަކާ ގުޅިގެން މަސައްކަތް ކުރުމަކީ ސަރުކާރުގެ އަމާޒެއް ކަމަށްވެސް އޭނާ ފާހަގަކުރިއެވެ.
މިދަނޑިވަޅުގައި، އިޒްރޭލުން ވެރިވެގަނެފައިވާ ޖޫލާން އުސްބިންތަކުގައި އާބާދީތައް ފުޅާކުރުމުގެ ދިގުމުއްދަތުގެ ރޭވުމެއް އިޒްރޭލުން ވަނީ ފާސްކޮށްފައެވެ. މިއީ ސޫރިޔާގެ އިއުތިރާޒުތައް އިތުރަށް ވަރުގަދަވާނެ ކަމެއް ކަމަށް ބެލެވެއެވެ. އިޒްރޭލުގެ މީޑިއާތަކުން ރިޕޯޓްކޮށްފައިވާ ގޮތުގައި، ކުރިއަށް އޮތް ފަސް އަހަރު ދުވަހުގެ ތެރޭގައި އެ ސަރަޙައްދުގެ އިންފްރާސްޓްރަކްޗަރ ވަރުގަދަކޮށް އާބާދީ އިތުރުކުރުމަށްޓަކައި ގާތްގަނޑަކަށް 334 މިލިއަން ޑޮލަރު ސަރުކާރުން ވަނީ ކަނޑައަޅާފައެވެ.
ފަހަކަށް އައިސް ފެންނަމުންދާ ޑިޕްލޮމެޓިކް ހަރަކާތްތަކުން ކުރިއެރުންތަކާއި ހުރަސްތައް ވެސް ހާމަވެއެވެ. ތުރުކީގައި ބޭއްވުނު ’އަންޓާލިއާ ޑިޕްލޮމަސީ ފޯރަމް‘ އަށް ކުރި ޒިޔާރަތުގެ ތެރެއިން، އަލްޝަރާ ވަނީ އެމެރިކާގެ މަންދޫބު ޓޮމް ބަރަކްއާ ބައްދަލުކޮށް، ސަރަޙައްދީ ސަލާމަތާއި އިސްރާއީލާއެކު އޮތް ގުޅުންތަކާ ބެހޭގޮތުން މަޝްވަރާ ކޮށްފައެވެ. އޭނާ ސޫރިޔާގެ މަގާމު ސިފަކުރީ، ގިނަ އަހަރުތަކެއްގެ ހަމަނުޖެހުންތަކަށްފަހު ސަރަޙައްދު ހަމަޖެއްސުމަށް ކުރެވެމުންދާ މަސައްކަތުގެ ބައެއްގެ ގޮތުގައެވެ.
