ކުރީގެ ރައީސް އިބްރާހިމް މުހައްމަދު ސޯލިހަށް ޒިނޭގެ ތުހުމަތު އޭނާ ނުކުރައްވާ ކަމަށާއި އެ ތުހުމަތު ރައީސް ސޯލިހަށް ކުރެއްވީ، ކުރީގެ ރައީސް މުހައްމަދު ނަޝީދު ކަމަށް ހިތަދޫ މެދު ދާއިރާގެ މެންބަރު އަދި ”ދިޔަރެސް“ ނޫހުގެ އެއް ފައުންޑަރު އަހުމަދު އަޒާން ވިދާޅުވެއްޖެ އެވެ.
”’އަދަދު’އަށް ފުލުހުން ވަދެގަތުމާއި އަޒާން ކުރެއްވި ތަޖުރިބާ“ ގެ ނަމުގައި ”ދައުރު“ ނޫހުގެ މޫސާ ލަތީފް ލިޔެ ޝާއިއުކޮށްފައިވާ ރިޕޯޓެއްގައި ރައީސް ސޯލިހަށް އަޒާން ”ޒިނޭ“ ގެ ތުހުމަތުކޮށްފައިވާ ކަމަށް ބުނެފައިވުމާއި އެކިއެކި ތުހުމަތުތައް އަޒާންއަށް ކޮށްފައިވުމާ ގުޅިގެން އަޒާން އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، ދައުރު ނޫހުގެ އެޑިޓަރު މޫސާ ލަތީފުގެ ލިޔެފައިވާފަދަ އެއްވެސް ތުހުމަތެއް އެއްވެސް އިރަކު އޭނާ ރައީސް ސޯލިހަށް ނުކުރާ ކަމަށެވެ.
”އެ ދުވަހު ކުރި ސުވާލުގެ ވީޑިއޯ އަދިވެސް ރައީސް އޮފީހުގެ ވެބްސައިޓުން ފެންނަ އެބަހުރި. އަޅުގަނޑު ކުރި ސުވާލަކީ، ރައީސް ސޯލިހުގެ މައްޗަށް އިސްލާމްދީނުގައި ހައްދު ކަނޑައެޅިފައިވާފަދަ ކުށެއް ކުރުމުގެ ތުހުމަތު ރައީސް ނަޝީދު ކުރެއްވި އިރު ރައީސް ނަޝީދުގެ މައްސަލަ ނުބަލަނީ ކީއްވެތޯ. ކުރުކޮށް ބުނާނަމަ، ރައީސްގެ މައްޗަށް ރައީސް ނަޝީދު ގަޒްފުކޮށްފައިވާއިރު އެކަން ނުބަލަނީ ކީއްވެތޯ. އަޅުގަނޑު ނޫނީ ދިޔަރެސް ނޫހުން އަމިއްލައަކަށް އެއްވެސް ކަހަލަ ތުހުމަތެއްކޮށްފައި ނުވާނެ. މިއީ މިހާރު މިހިނގައިގެން އުޅޭ ކަންތަކާ، އެތައް ހާސްގުނަ ތަފާތުކަމެއް“ އަޒާން ވިދާޅުވިއެވެ.
އަޒާން ވިދާޅުވީ، މޫސާ ލަތީފަށް އެ ދުވަހު އެ މަޖިލީހުގައި ހުރެ، ދިވެހި ބަހުން ކުރި ސުވާލެއް ފަހުމް ނުވުމަކީ ހިތާމަކުރާކަމެއް ކަމަށެވެ.
އަޒާން ވިދާޅުވީ، އެމްޑީޕީގެ ވެރިކަމުގައި ތަފާތު ދޮގު ތުހުމަތުތައްކޮށް އޭނާ ތިން ފަހަރު ފުލުހަށް ހާޒިރު ކުރި ކަމަށާއި ކޯޓު އަމުރެއް ނެތި، އޭނާގެ ފޯން ކޯލްތައް އަޑު އެހި ކަމަށެވެ.
”އަދި ބޭރު ގައުމެއްގެ އެމްބަސީއަށް ބޮމުގެ ހަމަލާއެއް ދޭނެކަމަށް މީހަކު ޓުވީޓު ކުރުމުން، އެކަން ކުރީވެސް އަޅުގަނޑުގެ ސަބަބުން ކަމަށް ހަދާ ރާއްޖޭގެ ސަރުކާރުން އަދި އެމްޑީޕީން ބަޔާން ނެރެ އަޅުގަނޑާ އަޅުގަނޑުގެ އާއިލާ ނުރައްކަލުގެ ތެރެއަށް ވައްޓާލި. ކުރި ޓުވީޓަކާ ގުޅިގެން އަޅުގަނޑުމެންގެ ނޫހުގެ އެއް ހިއްސާދާރު އަދާކުރަމުން އައި ދައުލަތުގެ ވަޒީފާއިން ވަކިކުރި.“ އަޒާން ވިދާޅުވިއެވެ.
މީގެ އިތުރުން ދިޔަރެސްއަށް މާލީގޮތުން އެހީތެރިވަމުން ދިޔަ ކުންފުނިތަކަށް ބިރު ދެއްކި ކަމަށާއި އެ ހުރިހާ ކަމެއް ހިނގިއިރު، މޫސާ ލަތީފް ހުރީ ސަރުކާރުން ފައިސާ ނަގައިގެން ސަރުކާރުގެ ނެރޭޓިވް ޕްރޮމޯޓު ކުރުމަށް ކަމަށެވެ.
އަޒާން ވިދާޅުވީ، ސަރުކާރު ޒިންމާދާރުކުރަން 2018-2023 އަށް މޫސާ ލަތީފް ކުރި އެއްވެސް ކަމެއް ނެތް ކަމަށާއި 30 އަހަރު ދުވަހު ނޫސްވެރިކަން ކުރިއިރު، އޭގެ ބޮޑުބައި ހޭދަ ކުރީ ހުދުމުހުތާރު ވެރިކަމެއްގެ މޫނުމަތި އޮމާންކުރަން ކަމަށެވެ.
