އެމްޑީޕީގެ ކުރިއަށް އޮތް އެތެރޭގެ އިންތިޚާބުގެ ނަޒާހަތްތެރިކަން ދެމެހެއްޓުމަށްޓަކައި، އެ ޕާޓީގެ އިދާރީ ހުރިހާ މަސައްކަތްތަކުން ދުރަށް ޖެހިވަޑައިގެންފައިވާކަން އެޕާޓީގެ އިދާރީ ކަންކަމާއި ހަވާލުވެ ހުންނެވި މަރިޔަމް ޒުބައިރު (މަންދީ) އިޢުލާނު ކުރައްވައިފިއެވެ.
މަންދީ މި ފިޔަވަޅު އަޅުއްވާފައިވަނީ އޭނާގެ ދަރިފުޅު، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާޢީލް އަހްމަދު ނަސީމް، އެމްޑީޕީގެ ޗެއާޕާސަންގެ ނައިބު (އިދާރީ) ކަމުގެ އިންތިޚާބަށް ކުރިމަތިލުމާ ގުޅިގެންނެވެ. މަންދީ ވިދާޅުވީ، އިންތިޚާބުގެ މިނިވަންކަމާއި އިންސާފުވެރިކަން ކަށަވަރު ކުރުމަށްޓަކައި މި މަހުގެ 23 ވަނަ ދުވަހުން ފެށިގެން ޕާޓީގެ ހުރިހާ ރަސްމީ އަދި އިދާރީ މަސައްކަތްތަކުން އޭނާ ދުރަށް ޖެހިވަޑައިގެންފައިވާ ކަމަށެވެ.
https://twitter.com/MandhyZubair/status/2048973522761130246
މިކަމާ ގުޅޭގޮތުން އިތުރަށް ތަފްސީލު ދެއްވަމުން މަންދީ ވިދާޅުވީ، އޭނާއަކީ އެއްވެސް އިރަކު ޕާޓީގެ އިންތިޚާބާ ބެހޭ ކޮމިޓީގެ މެންބަރެއް ނޫން ކަމަށެވެ. އަދި އިންތިޚާބުގެ ޓައިމްލައިން ކަނޑައަޅައި ނިންމުމުގެ ކުރިންވެސް، މަސްލަހަތު ފުށުއަރާފާނެތީ މަސައްކަތްތަކުން ތަނާޒިލްވުމަށް ޗެއަރޕަރސަންގެ އަރިހުން އެދިވަޑައިގެންފައިވާނޭ ކަމަށް އޭނާ ފާހަގަކުރެއްވިއެވެ.
މީގެ އިތުރުން، ސޯޝަލް މީޑިއާގައި ދެކެވޭ ބައެއް ވާހަކަތަކަށް ރައްދު ދެއްވަމުން މަންދީ ވިދާޅުވީ، އެމްޑީޕީ ސެކްރެޓޭރިއެޓްގެ ރަސްމީ އެކްސް (X) އެކައުންޓް ބޭނުންކުރުމުގެ ހުއްދަ ނުވަތަ އެކްސެސް އޭނާއަށް އޮންނަ ކަމަށް ދެކެވޭ ވާހަކައަކީ ހަގީގަތެއް ނޫން ކަމަށެވެ. އަދި ފާއިތުވި ދޮޅު އަހަރު ދުވަހުގެ ތެރޭގައި އެ އެކައުންޓުން އެއްވެސް ޕޯސްޓެއް އޭނާ ކުރައްވާފައި ނުވާނެ ކަމުގެ ޔަގީންކަންވެސް ދެއްވިއެވެ.
”އިންތިޚާބެއްގެ އެންމެ ބޮޑު އަސާސަކީ ނުފޫޒުން އެއްކިބާވެފައިވާ، އިންސާފުވެރި މާހައުލެއް އޮތުމެވެ. އެހެންކަމުން، ޕާޓީގެ އާންމު މެންބަރުންގެ އިތުބާރު ދެމެހެއްޓުމަށާއި، މުޅި ޕާޓީގެ މަސްލަހަތަށްޓަކައި މިއީ ކޮންމެހެން ބޭނުންތެރި ކަމެއް ކަމުގައި އަޅުގަނޑު ދެކެމެވެ،“ މަންދީ ވިދާޅުވިއެވެ.
އެމްޑީޕީގެ އެތެރޭގެ އިންތިޚާބުތަކަކީ އަބަދުވެސް ވާދަވެރިކަން ބޮޑު އިންތިޚާބުތަކަކަށް ވާއިރު، އެޕާޓީގެ ކޮންމެ އިންތިޚާބެއްގައި ތަފާތު ފެކްޝަންތައް އުފެދި އެކަކު އަނެއްކެއްގެ އަބުރަށް އަރައިގަނެ ޒާތީ ފުރައްސާރަ ކުރުމަކީ އާންމުކަމެކެވެ.
