މީހުންގެ އަބުރު ކަތިލައި ގަޒުފުކުރުމަކީ ކީރިތި ޤުރްއާނާއި ނަބިއްޔާގެ މުޙައްމަދު ޞައްލަﷲ ޢަލައިހި ވަޞައްލަމަގެ ސުންނަތުގައި ނަހީކުރައްވާފައިވާ އަމަލުތަކެއް ކަމަށް އިސްލާމިކް މިނިސްޓަރު މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
މިނިސްޓަރު ޝަހީމް މި މޭރުމުން ވިދާޅުވީ ”އަދަދު“ ނޫހުން ”އައިޝާގެ“ ނަމުގައި ނެރުނު ޑޮކިއުމެންޓްރީއަކާއި ގުޅިގެން އެކްސްގައި ހިއްސާކުރެއްވި ޕޯސްޓެއްގައެވެ. މިނިސްޓަރު ވިދާޅުވީ، އިންސާނަކަށް ލިބިގެންވާ އެންމެ މަތިވެރި ޝަރަފަކީ އޭނާގެ އަބުރާއި ކަރާމަތުގެ ޝަރަފް ކަމަށެވެ. ކަން މިހެން އޮތުމުން އަބުރު ހިމާޔަތްކުރުމަކީ އިސްލާމީ ޝަރީއަތުގެ އެންމެ މަތިވެރި ފަސް މަގުސަދުގެ ތެރޭގައި ލައްވާފައިވާ ކަމެއް ކަމަށް މިނިސްޓަރު ވިދާޅުވިއެވެ.
ޚިޔާލު ފާޅުކުރުމުގެ ފުރިހަމަ މިނިވަންކަން ޤާނޫނު އަސާސީގެ ދަށުން ރާއްޖޭގައި ކަށަވަރު ކޮށްދީފައިވޭ. އަޅުގަނޑު ޤަބޫލު ކުރާ ގޮތުގައި ރާއްޖޭގައި ނޫސްވެރިންނަށް ފުރިހަމަ މިނިވަންކަން ލިބިގެންވޭ. ލިބިފައި އޮންނަންވެސް ޖެހޭ. ދުނިޔޭގައި ފުޅާ ދާއިރާއެއްގައި ނޫސްވެރިކަމުގެ މިނިވަންކަން…
— Mohamed Shaheem Ali Saeed (@Mohamedshaheem1) April 28, 2026
މިނިސްޓަރު ވިދާޅުވީ، ގާނޫނުއަސާސީގެ ދަށުން ހިޔާލު ފާޅުކުރުމުގެ މިނިވަންކަން ރާއްޖޭގައި ކަށަވަރުކޮށްދީފައިވާ ކަމަށާއި ނޫސްވެރިންނަށް ވެސް ފުރިހަމައަށް އެ މިނިވަންކަން ކަށަވަރުކޮށްދީފައިވާ ކަމަށެވެ. އަދި ދުނިޔޭގެ ނިސްބަތަށް ބަލާއިރު ވެސް ރާއްޖެއަކީ ނޫސްވެރިކަމުގެ މިނިވަންކަން އޮތް ގައުމަކަށްވާނެ ކަމަށް ޝަހީމް ފާހަގަކުރެއްވިއެވެ.
ނޫސްވެރިކަމުގެ މިނިވަންކަން މިހާ ފުޅާ ދާއިރާއެއްގައި ހުޅުވާލެވިފައިވާއިރު އެ މިނިވަންކަމުގެ ބޭނުން ހެޔޮ ގޮތުގައި ހިފަންޖެހޭކަން ފާހަގަކުރައްވަމުން މިނިސްޓަރު ވިދާޅުވީ، އަނިޔާވެރިކަމާއި ބޭއިންސާފާއި ކޮރަޕްޝަން ނައްތާލުމުގައި ނޫސްވެރިކަމަކީ ރާއްޖޭގައި މުހިންމު ދައުރެއް އަދާކުރާކަމެއް ކަމަށެވެ. މި ސަބަބުތަކަށްޓަކައި ނޫސްވެރިކަމަކީ ރާއްޖޭގައި ގައުމީ ފެންވަރުގައި އަގުވަޒަންކުރެވޭ ކަމެއް ކަމުގައި ވެސް މިނިސްޓަރު ވަނީ ވިދާޅުވެފައެވެ.
”ނޫސްވެރިކަމުގެ މިނިވަންކަމަކީ އިސްލާމްދީނާއި ގާނޫނުއަސާސީގެ އިމުން ބޭރުން މީހުންގެ އަބުރާއި އިއްޒަތަށް އަރައިގަނެ ފުރައްސާރަކޮށް ބުލީކުރުމުގެ ނިޒާމަކަށް ބަދަލުވެއްޖެނަމަ މުޖުތަމައު ހަލާކުވެގެން ހިނގައިދާނެ، ނަޒާހަތްތެރި ނޫސްވެރިކަމަކީ މުޖުތަމައު ސަލާމަތުގެ އައްސޭރިއަށް ގެންގޮސްދޭނެ ވަރުގަދަ ނިޒާމެއް، ނޫސްވެރިކަން ހެޔޮގޮތުގައި ދަމަހައްޓަން މަސައްކަތްކުރަންޖެހޭނެ،“ – މިނިސްޓަރު ޝަހީމް ވިދާޅުވިއެވެ.
ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސަރުކާރަކީ ނޫސްވެރިކަމަށް ވަރަށް ބޮޑު އަހައްމިއްޔަތުކަމެއްދޭ ސަރުކާރެއް ކަމަށާއި އެކަމުގެ އެންމެ ސާފު ދަލީލަކީ ރައީސް އަމިއްލަފުޅަށް ކޮންމެ ހަފްތާއަކު ނޫސްވެރިންނާ ބައްދަލުކުރައްވައި ނޫސްވެރިން ކުރާ ސުވާލުތަކަށް ޖަވާބު ދެއްވުން ކަމަށް މިނިސްޓަރު ވަނީ ވިދާޅުވެފައެވެ. މީގެ އިތުރުން މައުލޫމާތު ހާމަކުރުމަކީ މި ސަރުކާރުން ވަރަށް ބޮޑު އިސްކަމެއްދީގެން ކުރަމުން އަންނަ މަސައްކަތެއް ކަމަށްވެސް މިނިސްޓަރު ވިދާޅުވިއެވެ.
”ހިތާމައާއެކު ދަންނަވަންޖެހެނީ، މިއަދު ރައީސް މުޢިއްޒާއި އެމަނިކުފާނުގެ ބޭފުޅުންނާއި އާއިލާއަށާއި ވަޒީރުންނާއި އާއިލާތަކަށް ރާއްޖޭގެ ބައެއް ނޫސްތަކުންނާއި ޗެނަލްތަކުންނާއި ސޯޝަލް މީޑިއާގެ ވަގު އެކައުންޓްތަކުން ފުރައްސާރަކުރަމުން ގެންދަނީ މީގެ ކުރިން ރާއްޖޭގައި މިފަދަ ކަންކަން ކުރިމަތިވެފައި ނުވާ މިންވަރަށްކަން، އަޅުގަނޑު ގަބޫލުކުރާގޮތުގައި އިންސާފަށް ލޯބިކުރާ އެއްވެސް ރައްޔިތަކު މިކަންކަން ބަލައި ނުގަންނާނެ، ކަންކަމަށް ފާޑުކިއުމަކީ މައްސަލައެއްނޫން ނަމަވެސް ޒާތީގޮތުން ދިމާކުރުމަކީ ނޭދެވޭ އަމަލެއް،“ – މިނިސްޓަރު ޝަހީމް ވިދާޅުވިއެވެ.
މިނިސްޓަރު ޝަހީމްގެ ވާހަކަކޮޅު ނިންމަވާލައްވާފައިވަނީ ގާނޫނުއަސާސީން ލިބިދީފައިވާ ހިޔާލު ފާޅުކުރުމުގެ މިނިވަންކަން އިސްލާމްދީނާއި ގާނޫނުގެ ހުދޫދުގެ ތެރޭގައި ދެމެހެއްޓުމަށް ހުރިހާ ފަރާތްތަކުގެ ކިބައިން އެދިވަޑައިގަންނަވަމުންނެވެ.
