މާލެ ރީޖަނަލް ލީގު، ދެވަނަ ޑިވިޝަން 2026 ފުޓުބޯޅަ މުބާރާތުގެ ގްރޫޕް ބީގައި ކްލަބް ޓީނޭޖްގެ މައްޗަށް ލޮރެންޒޯ ސްޕޯރޓްސް ކްލަބުން ކުރި ހޯދައިފިއެވެ.
ގަލޮޅު ދަނޑުގައި ކުޅުނު މި މެޗުގައި ޓީނޭޖްގެ މައްޗަށް ލޮރެންޒޯ ކުރި ހޯދީ 1-3 ގެ ނަތީޖާއަކުންނެވެ. މި މޮޅާއެކު ލޮރެންޒޯއަށް ވަނީ ދެވަނަ ޑިވިޝަނުގެ ދެވަނަ ބުރުގެ ޖާގައެއް ޔަގީންވެފައެވެ.
މި މެޗުގައި މޮޅަށް ކުޅެ، ގިނަ ވަގުތު ބޯޅަ ހިފަހައްޓައިގެން އެޓޭކިން ގޭމެއް ކުޅެފައިވަނީ ލޮރެންޒޯއިންނެވެ. މެޗުގައި ލޮރެންޒޯގެ ފުރަތަމަ ލަނޑު ކާމިޔާބުކޮށްދީފައިވަނީ ޙުސައިން ހަނާންއެވެ. މެޗުގެ 20 ވަނަ މިނެޓުގައި ހަނާން ޖެހި މި ލަނޑާއެކު ލޮރެންޒޯއިން ލީޑު ނަގާފައިވާއިރު، އޭގެ އަށެއްކަ މިނެޓުފަހުން ހަނާން ވަނީ އިތުރު ލަނޑެއް ޓީމަށް ކާމިޔާބުކޮށްދީފައެވެ.
މި މެޗުގައި ދެ ލަނޑުގެ ލީޑެއް އޮވެ، ދެވަނަ ހާފު ފަށައިގެން 10 މިނެޓުގެ ތެރޭގައި އެ ޓީމުން އަނެއްކާ ވެސް ވަނީ ތިންވަނަ ލަނޑެއް ކާމިޔާބުކޮށްފައެވެ. އެ ޓީމަށް މި ލަނޑު ކާމިޔާބުކޮށްދިނީ ޖުމައިލް ޖަމީލްއެވެ.
މެޗުގައި ޓީނޭޖުން ޖެހި ހަމައެކަނި ލަނޑު، މެޗުގެ 58 ވަނަ މިނެޓުގައި ކާމިޔާބުކޮށްދިނީ އެ ޓީމުގެ ބިދޭސީ ފޯވާޑް އަނަސް އިބްރާޙީމް އައްބާސްއެވެ. އޭނާ މި ލަނޑު ކާމިޔާބުކޮށްފައިވަނީ އެ ޓީމަށް ލިބުނު ޕެނަލްޓީއަކުންނެވެ. މި މޮޅާއެކު ތާވަލުގެ އެއްވަނައިގައި ތިން މެޗުން ނުވަ ޕޮއިންޓު ހޯދައިގެން ލޮރެންޒޯ ކުރީގައި އޮތްއިރު، މެޗުން ބަލިވި ޓީނޭޖް ފުލުގައި އޮތީ އެންމެ ޕޮއިންޓެއް ނުލިބިއެވެ. ކުޅުނު ތިން މެޗުން ވެސް ޓީނޭޖް ވީ ބައްޔެވެ.
މުބާރާތުގައި ލޮރެންޒޯ ދެން ބައްދަލުކުރާނީ ޔުނައިޓެޑް ހެންވޭރިއަންސްއާއި ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މި ހަފުތާގެ ހުކުރު ދުވަހުއެވެ. ޓީނޭޖު ދެން ބައްދަލުކުރާނީ ޓެންޓް ސްޕޯޓްސް ކުލަބާ ދެކޮޅަށް ކުޅެން އޮތް މެޗުގައެވެ. މި މެޗު ބޭއްވުމަށް ހަމަޖެހިފައިވަނީ މި ހަފުތާގެ ބުރާސްފަތި ދުވަހުގެ ރޭގައެވެ.
