ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ ދަނާލުގައި ދިރިއުޅެމުންދިޔަ 18 އަހަރުގެ އަންހެން ކުއްޖަކު ނިޔާވި ހާދިސާއާ ގުޅިގެން، އެ ކުއްޖާގެ ނަފްސާނީ ދުޅަހެޔޮކަމާ ގުޅޭ ޒާތީ މައުލޫމާތު ހޯމް މިނިސްޓަރު ޢަލީ އިޙްސާން ހާމަކުރެއްވުމަކީ ރަނގަޅު ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. ރައީސް ވިދާޅުވީ، ބައިނަލްއަގުވާމީ މިންގަނޑުތަކަށް ބަލާއިރު ވެސް އެފަދަ ސީރިއަސް މައުލޫމާތެއް ހާމަކުރުމަކީ ގަބޫލުކުރެވޭނެ ކަމެއް ނޫން ކަމަށާއި އެކަން އެގޮތަށް ކުރަން ހުދު އެމަނިކުފާނު ވެސް ބޭނުންފުޅު ނުވާ ކަމަށެވެ.
ކަން މިހެން އޮތް ނަމަވެސް އެފަދަ ހައްސާސް މައުލޫމާތުތަކެއް ހާމަކުރަން މިނިސްޓަރު އިޙްސާނަށް ވެސް މަޖުބޫރުވީ މީސް މީޑިއާގައި ފެތުރެމުންދިޔަ ހަގީގަތާ ހިލާފު ވާހަކަތަކުގެ ސަބަބުންކަން ރައީސް ފާހަގަކުރެއްވިއެވެ. އެ ކުއްޖާ ނިޔާވުމާ ގުޅިގެން ފުލުހުން އިހުމާލުވި ކަމަށާއި އެހީތެރިކަން ފޯރުކޮށްނުދޭ ކަމަށް ބުނެ ވާހަކަތައް ފަތުރަމުން ދިޔަކަން ރައީސް ވަނީ ވިދާޅުވެފައެވެ.
މި ވާހަކަތަކުގެ ސަބަބުން މައްސަލައިގައި އަމަލީ ގޮތުން ހަރަކާތްތެރިވި މުވައްޒަފުންނާއި އެމީހުންގެ އާއިލާތަކަށް ނުރައްކާވެ، ނަފްސާނީ ބޮޑު ޕްރެޝަރާ ކުރިމަތިލާންޖެހުނު ކަމަށާއި، އެހެންކަމުން ހަގީގީ ހާލަތު އޮޅުންފިލުވައިދިނުމަށްޓަކައި ކުރުކުރު މައުލޫމާތުކޮޅެއް ހިއްސާކުރަން މިނިސްޓަރަށް މަޖުބޫރުވީ ކަމަށް އެމަނިކުފާނު ވިދާޅުވިއެވެ.
ރައީސް މުޢިއްޒު ވިދާޅުވީ، މިފަދަ ހާދިސާއެއް ހިނގާއިރު މުއައްސަސާއަކުން ގޯހެއް ހެދިކަމަށް އެހައި އަވަހަށް ނިންމުމަކީ އޮންނަ އާދައަކަށް ބަދަލުވެފައިވާ ކަމަށާއި، އެކަން އޮތްގޮތް މިހާރުން މިހާރަށް ބަދަލުކުރަންޖެހޭ ކަމަށެވެ. މިފަދަ ހައްސާސް މައްސަލަތަކުގައި މީޑިއާތަކުން ވެސް ވަކި މިންގަނޑުތަކަކަށް ތަބާވާކަން ފާހަގަކުރައްވަމުން، ރައީސް ވަނީ މުސްތަގުބަލުގައި މިފަދަ މައުލޫމާތުތައް ހާމަނުކޮށް ފަރުޖެއްސޭނެ ފަދަ މާހައުލެއް އޮތުން މުހިންމު ކަމަށް ވިދާޅުވެފައެވެ.
