ފޮރިންގ މިނިސްޓްރީގެ އެމްބެސެޑަރ އެޓް ލާޖުގެ މަގާމަށް އައްޔަންކުރެއްވި 3 ބޭފުޅުން ކަމަށްވާ އާދަމް ޝަރީފް ޢުމަރާއި، ޠާރިޤް އިބްރާހިމްގެ އިތުރުން ފާޠިމަތު ދިޔާނާ ސަޢީދު އައްޔަންކުރެއްވީ އެ މިނިސްޓްރީގެ ހުސްވެފައިވާ މަގާމުތަކަށް ކަމަށާއި، އެއީ އަލަށް އުފެއްދި މަގާމުތަކެއް ނޫންކަމަށް ރައީސުލްޖުމްހޫރިއްޔާ ޑރ. މުހާއްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. އެމަނިކުފާނު ވިދާޅުވީ، ފޮރިންގ މިނިސްޓްރީގެ މަގާމުތަކަކަށް އެ ބޭފުޅުން އައްޔަންކުރައްވަން އާ މަގާމުތަކެއް އުފައްދަވާފައި ނުވާނެ ކަމަށާއި، ކުރިއަށް އޮތް ތަނުގައި އެ 3 ބޭފުޅުން ސަފީރު ކަމަށް ވަޑައިގެންނެވުމަށް ހަމަޖެހިފައިވާ ކަމަށެވެ.
އެގޮތުން އިދާރީ ގޮތުން ހަމަޖެހެންޖެހޭ ކަންތައްތަކެއް ހުރުމުގެ ސަބަބުން، އެކަންކަން ނިމެންދެން އެ 3 ބޭފުޅުން ވަގުތީ ގޮތުން އެމްބެސެޑަރ އެޓް ލާޖުގެ މަގާމުގައި ތިއްބަވާނެކަން ފާހަގަކުރައްވައި ރައީސް ވިދާޅުވީ، މިއީ މީގެ ކުރިން ވެސް މިފަދަ ކަންކަމުގައި އަމަލު ކުރަމުން އައިސްފައިވާ އުސޫލު ކަމަށެވެ.
މި ވަގުތު ރާއްޖެއިން ބޭރުގެ ބައެއް ގައުމުތަކަށް ކަނޑައަޅާފައިވާ ސަފީރުންގެ މަގާމުތައް ވަނީ ހުސްވެފައެވެ. އެގޮތުން ޔޫއޭއީ، އިނގިރޭސިވިލާތް އަދި ބެލްޖިއަމްގެ ސަފީރުކަމުގެ މަގާމު ހިމެނެއެވެ. މި 3 ބޭފުޅުން އެމްބެސެޑަރ އެޓް ލާޖުގެ މަގާމަށް އައްޔަންކުރެއްވީ، ހުސްވެފައިވާ މަގާމުތަކަށް އައްޔަންކުރެއްވުމުގެ މަރުހަލާގެ ތެރެއިންނެވެ.
ފާހަގަކޮށްލެވޭ ގޮތުގައި މި 3 ބޭފުޅުންގެ ތެރެއިން އާދަމް ޝަރީފް ޢުމަރާއި ޠާރިޤް އިބްރާހިމަކީ މި ސަރުކާރުގެ އެންމެ ފުރަތަމަ ކެބިނެޓް މިނިސްޓަރުންގެ ތެރޭގައި ހިމެނިވަޑައިގަންނަވާ 2 ބޭފުޅުންނެވެ. އެގޮތުން މި ސަރުކާރުން އަލަށް އުފެއްދި ސިޓީސް، ލޯކަލް ކައުންސިލް އެންޑް ޕަބްލިކް ވޯކްސް މިނިސްޓަރުކަން އާދަމް ޝަރީފް ޢުމަރު ކުރައްވާފައިވާއިރު، ޠާރިޤް އިބްރާހިމް ވަނީ އެންވަޔަރަމަންޓް، ކްލައިމެޓް ޗޭންޖް އެންޑް އެނަރޖީ މިނިސްޓަރުކަން ކުރައްވައިފައެވެ.
ނަމަވެސް މި މަހުގެ 14 ވަނަ ދުވަހު މި 2 ބޭފުޅުންވަނީ މަގާމުން އިސްތިއުފާދެއްވައިފައެވެ.
