ރ. ރަސްގެތީމުގައި އެކަނި ދިރިއުޅެމުންދިޔަ މީހެއްގެ ޚަބަރެއްނުވެގެން ފުލުހުންނަށް ރިޕޯޓްކުރުމާ ގުޅިގެން ބެލިބެލުމުން، އެމީހާ މަރުވެފައި އޮއްވާ ފެނިއްޖެއެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، ނިޔާވެފައި އޮއްވާ ފެނިފައިވަނީ ރަސްގެތީމު، ސޯސަންގެ، އިބްރާހިމް ޔޫސުފުފުޅު (55އ) އެވެ. އޭނާ ފެނިފައިވަނީ އޭނާ ދިރިއުޅޭ ކޮޓަރިން ބޭރަށް ނުނިކުމެ، ޚަބަރެއްނުވެ ދެ ދުވަސް ވެފައިވާތީ ފުލުހުންނަށް ލިބުނު މަޢުލޫމާތަކާ ގުޅިގެން ބެލިބެލުމުންނެވެ.
ފުލުހުން އެ ގެއަށް ވަދެފައިވަނީ 2026 އޭޕްރީލް 26 ވަނަ ދުވަހުގެ ރޭ 21:53 އެހައިކަންހާއިރުއެވެ. ފުލުހުންގެ މީޑިއާ އޮފިޝަލް އިތުރަށް މަޢުލޫމާތު ދެއްވި ގޮތުގައި، މިހާތަނަށް ބެލި ބެލުމުން އިބްރާހިމް ޔޫސުފުފުޅުގެ ހަށިގަނޑުގެ ބޭރުފުށުން އެއްވެސް އަނިޔާއެއްގެ ނިޝާނެއް ފެންނާކަށް ނެތެވެ.
މި މައްސަލައާ ގުޅިގެން ބަލަންޖެހޭ އިތުރު ކަންކަން ފުލުހުން ދަނީ ތަޙުޤީޤު ކުރަމުންނެވެ.
