ފޮރިން މިނިސްޓްރީގެ އެމްބެސެޑަރ އެޓް ލާޖުގެ މަގާމަށް މި ސަރުކާރުގެ ފުރަތަމަ ދެ މިނިސްޓަރުން ކަމަށްވާ އާދަމް ޝަރީފް ޢުމަރާއި، ޠާރިޤް އިބްރާހިމްގެ އިތުރުން ކުރީގެ ބަންޑާރަ ނައިބު ފާޠިމަތު ދިޔާނާ ސަޢީދު އައްޔަންކުރައްވައިފިއެވެ.
ފޮރިން މިނިސްޓްރީގެ އެމްބެސެޑަރ އެޓް ލާޖުގެ މަގާމަށް މި 3 ބޭފުޅުން އައްޔަންކުރައްވާފައިވާއިރު، ބޭރުގެ ބައެއް ސަފީރުންގެ މަގާމު މި ވަގުތު ވަނީ ހުސްވެފައެވެ. އޭގެ ތެރޭގައި ޔޫއޭއީގެ ސަފީރުގެ މަގާމާއި، އިނގިރޭސި ވިލާތުގެ ސަފީރުގެ މަގާމުގެ އިތުރުން ބެލްޖިއަމްގެ ސަފީރުގެ މަަގާމު ހިމެނެއެވެ. މި 3 ބޭފުޅުން ވެސް މަގާމުތަކަށް އައްޔަންކުރެއްވުމާއެކު މިހާރު ވަނީ ވަޒީފާއަށް ނުކުންނަވަން ފައްޓަވައިފައެވެ.
މައުލޫމާތު ލިބިފައިވާ ގޮތުގައި މި 3 ބޭފުޅުންގެ މަގާމު ހަމަޖައްސަވާފައިވަނީ ތަފާތު ތިން ދުވަހެއްގައެވެ.
ފާހަގަކޮށްލެވޭ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ސަރުކާރުގައި އާދަމް ޝަރީފް ވަނީ ސިޓީސް މިނިސްޓަރުކަން ކުރައްވައިފައެވެ. އަދި ޠާރިޤް ވަނީ ޓޫރިޒަމް، އެންވަޔަރަމަންޓް މިނިސްޓަރުކަން ކުރައްވައިފައެވެ. ނަމަވެސް މި މަހުގެ 14 ވަނަ ދުވަހު ކެބިނެޓްގައި ހިމެނިވަޑައިގަންނަވާ 10 މިނިސްޓަރަކު އިސްތިއުފާ ދެއްވިއިރު އޭގެ ތެރޭގައި އެ 2 ބޭފުޅުން ހިމެނި ވަޑައިގަންނަވައެވެ.
އެ ބޭފުޅުން މަގާމުން އިސްތިއުފާދެއްވީ ރައްޔިތުންގެ ވިންދާ އެއްގޮތަށް ސަރުކާރު ހިންގުމަށް ރައީސް މުޢިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދިނުމަށްޓަކައެވެ.
