ކާރިސާތަކުން އަރައިގަތުމަށް ބޭނުންވާ 66 މިލިއަން ރުފިޔާގެ ތަކެތި ޖަޕާނު ސަރުކާރުން ދިވެހި ސަރުކާރަށް ހަދިޔާކޮށްފިއެވެ.
ޖަޕާން ސަރުކާރުގެ އެހީގައި ކުރިއަށްގެންދާ ”ޖަޕާން ގްރާންޓް އެއިޑް ފޯ ދަ އިކޮނޮމިކް އެންޑް ސޯޝަލް ޑިވެލޮޕްމަންޓް“ ޕްރޮޖެކްޓްގެ ދަށުން، ކާރިސާތަކުން އަރައިގަތުމަށް ބޭނުންވާ ގާތްގަނޑަކަށް 66 މިލިއަން ދިވެހި ރުފިޔާގެ އަގުހުރި ތަކެތި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އާއި ހަވާލުކޮށްފައިވަނީ އެކަމަށްޓަކައި މިއަދު ބޭއްވި ރަސްމިއްޔާތުގައެވެ.
The National Disaster Management Authority acknowledges, with sincere appreciation, the generous contribution of disaster response equipment valued at approximately USD 4.3 million from the Government of Japan under the Economic and Social Development Programme .
The equipment… pic.twitter.com/FnTbqYa8Cq
— NDMA Maldives (@NDMAmv) April 26, 2026
މި ރަސްމިއްޔާތުގައި ޖަޕާން ސަރުކާރުގެ ފަރާތުން އެންޑީއެމްއޭއަށް މި ތަކެތި ހަވާލުކޮށްދެއްވީ ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު، އިޝިގާމީ ރޫމީކޯއެވެ. އެންޑީއެމްއޭގެ ފަރާތުން މި ތަކެއްޗާ ހަވާލުވެލެއްވީ އެ އޮތޯރިޓީގެ ޗީފް އެގްޒެކެޓިވް ޙިސާން ޙަސަންއެވެ.
މި މަޝްރޫއުގެ ފުރަތަމަ ފިޔަވަހީގެ ދަށުން މިއަދު ހަދިޔާކޮށްފައިވާ ތަކެތީގެ ތެރޭގައި ހިމެނެނީ އަލިފާން ނިއްވާ 40 ޕަންޕާއި، 40 ފެންހިންދާ ޕަންޕް އަދި އެއާ ގުޅޭ އިތުރު އާލާތްތަކެވެ. މި މަޝްރޫޢަކީ 2024 ވަނަ އަހަރުގެ މާރިޗު މަހުގެ 24 ވަނަ ދުވަހު ސޮއިކުރެވުނު އެއްބަސްވުމެއްގެ ދަށުން ކުރިއަށްގެންދާ މަޝްރޫއެއްކަން ފާހަގަކޮށްލެވެއެވެ.
ޖަޕާނަކީ ރާއްޖެއަށް ދިމާވާ ކާރިސާތަކުގެ ނުރައްކާ ކުޑަކުރުމުގެ ދާއިރާގައި ފާހަގަކޮށްލެވޭ މުހިއްމު ބައިވެރިއެކެވެ. އެގޮތުން 2015 ވަނަ އަހަރާއި 2017 ވަނަ އަހަރު އެންޑީއެމްއޭ ބިނާކުރުމަށް ބޮޑެތި އެހީތަކެއް ފޯރުކޮށްދީފައިވާއިރު، 2025 ވަނަ އަހަރު މާލޭގައި ބޭނުންކުރުމަށް ދެ އިމަޖެންސީ ސަޕޯޓް ވެހިކަލް ހޯދުމަށް 89,900 ޑޮލަރުގެ އެހީއެއް ދިނުމަށް އެ ގައުމުން ވަނީ ނިންމައިފައެވެ.
