އެސްއެމްއީ ޑިޖިޓަލް މެދުވެރިކޮށް، ކުދި ވިޔަފާރިތަކަށް 375 މިލިއަން ރުފިޔާގެ ލޯނު ދޫކޮށްފިއެވެ.
2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން މި ހިނގާ އޭޕްރީލް މަހުގެ 15 ވަނަ ދުވަހުގެ ނިޔަލަށް 575 ވިޔަފާރިއަކަށް ޖުމުލަ 375 މިލިއަނަށްވުރެ ގިނަ ރުފިޔާ މިހާތަނަށް ދޫކޮށްފައިވާ ކަމަށް އެސްއެމްއީ ޑިޖިޓަލްއިން ވަނީ މައުލޫމާތުދީފައެވެ. އެގޮތުން ވަކިވަކި ދާއިރާތަކަށް ދޫކޮށްފައިވާ ލޯނުގެ އަދަދު ވެސް އެސްއެމްއީ ޑިޖިޓަލްއިން ވާނީ އާންމުކޮށްފައެވެ. އެއީ:
- ދަނޑުވެރިކަމަށް: 6 މިލިއަން ރުފިޔާ
- ވިޔަފާރިތަކަށް: 116 މިލިއަން ރުފިޔާ
- އިމާރާތްކުރުމަށް: 5 މިލިއަން ރުފިޔާ
- މަސްވެރިކަމަށް: 102 މިލިއަން ރުފިޔާ
- އިންފޮމޭޝަން ޓެކްނޮލޮޖީއަށް: 6 މިލިއަން ރުފިޔާ
- އުފެއްދުންތެރިކަމަށް: 34 މިލިއަން ރުފިޔާ
- ފަތުރުވެރިކަމަށް: 81 މިލިއަން ރުފިޔާ
- ދަތުރުފަތުރަށް: 21 މިލިއަން ރުފިޔާ
އެސްއެމްއީ ޑިޖިޓަލް މެދުވެރިކޮށް ފަސޭހައިން ލިބޭ ކުދި ފައިނޭންސިންގއާއި ލޯނުގެ ފުރުސަތުތަކާއިއެކު އާ ހިޔާލުތައް އާމްދަނީ ލިބޭ ފަދަ ވިޔަފާރިތަކަށް ބަދަލުވެފައިވާކަން ފާހަގަކުރަމުން އެ ކުންފުނިން ބުނެފައިވަނީ، މިކަމުގެ ސަބަބުން ޒުވާނުންނަށާއި، ފްރީލާންސްކޮށް މަސައްކަތް ކުރާ ފަރާތްތަކުގެ އިތުރުން ގޭގައި މަސައްކަތް ކުރާ ފަރާތްތަކަށް ބޮޑެތި މަންފާތަކެއް ލިބިގެން ގޮސްފައިވާ ކަމަށެވެ.
މީގެ އިތުރުން އެސްއެމްއީ ޑިޖިޓަލްއިން ވަނީ، އަންހެން ވިޔަފާރިވެރިންނަށް އިތުރު ފުރުސަތުތައް ހޯދައިދީ، އިގްތިސާދީ ގޮތުން ބާރުވެރި ބަޔަކަށް ހެދުމަށް މާލީ މިނިވަންކަން ކަށަވަރު ކޮށްދޭނެ ފައިނޭންސިންގ ސްކީމްތަކެއް ވެސް އެކުލަވާލައިފައެވެ.
އެސްއެމްއީ ޑިޖިޓަލްގެ ހިދުމަތްތައް ބައްޓަން ކޮށްފައިވަނީ، ހުރިހާ ސިނާއަތްތައް ހިމެނޭހެންނެވެ. އެހެންކަމުން މަސްވެރިކަމާއި، ފަތުރުވެރިކަމުގެ ދާއިރާގައި ބޭނުންކުރާ ކަނޑުއުޅަނދު ފަހަރާއި، މުދާ އުފުލާ ބޯޓުފަހަރު ހޯދުމަށް ބޭނުންވާ މާލީ އެހީތެރިކަން ލުއިފަސޭހަ އުސޫލުތަކެއްގެ ތެރެއިން ފޯރުކޮށްދިނުމަށް ހާއްސަ އިސްކަމެއް ދޭކަމަށް އެ ކުންފުނިން ވަނީ ބުނެފައެވެ.
