ށ. އަތޮޅުގެ 3 ރަށެއްގެ މަގުތައް ޒަމާނީ ފެންވަރަކަށް ތަރައްގީކުރުމުގެ މަސައްކަތް ރޯޑް ޑިވެލޮޕްމަންޓު ކޯޕަރޭޝަން (އާރްޑީސީ) އިން ފަށައިފިއެވެ.
ޕަބްލިކް ސެކްޓަރ އިންވެސްޓްމަންޓް ޕްރޮގްރާމްގެ ދަށުން، ށ. ކަނޑިތީމު، ށ. ގޮއިދޫގެ އިތުރުން ށ. މަރޮށީގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ އަމަލީ މަސައްކަތް ފެށުމަށްޓަކައި ކުރަންޖެހޭ ސާރވޭގެ މަސައްކަތްތައް ކުރަމުން އަންނަކަމަށް އާރްޑީސީން ވަނީ ބުނެފައެވެ.
މި މަޝްރޫއުގެ ދަށުން ކަނޑިތީމުގެ މަގުހެދުމުގެ މަސައްކަތުގެ އާރްޑީސީއާއި ހަވާލުކޮށްފައިވަނީ މިދިޔަ އަހަރުގެ އޮކްޓޫބަރު މަހުގެ 13 ވަނަ ދުވަހުއެވެ. މި މަޝްރޫއުގެ ދަށުން ކަނޑިތީމުގެ 7 މަގެއްގައި ތާރު އަޅައިގެން ޒަމާނީ ފެންވަރަށް ތަރައްގީކުރުމަށް ވަނީ ހަމަޖެހިފައެވެ. މި މަޝްރޫއަށް ޖުމުލަ 76.4 މިލިއަން ރުފިޔާއަށް ހަރަދުވާއިރު، މަގުހެދުމުގެ މަސައްކަތް ނިންމުމަށް ހަމަޖެހިފައިވަނީ 730 ދުވަހުގެ ތެރޭގައެވެ.
މަރޮށި މަގުހެދުމުގެ މަސައްކަތް އާރްޑީސީއާއި ހަވާލުކޮށްފައިވަނީ މިދިޔަ އަހަރުގެ އޮގަސްޓު މަހުގެ 7 ވަނަ ދުވަހުއެވެ. މި މަޝްރޫއުގެ ދަށުން 8 މަގެއްގައި ތާރު އަޅައިގެން ޒަމާނީ ފެންވަރަކަށް ތަރައްގީކުރެވިގެންދާނެއެވެ. މި މަޝްރޫއަށް ހޭދަވާނެކަމަށް ލަފާކުރެވެނީ 60.2 މިލިއަން ރުފިޔާއެވެ. މި މަސައްކަތަކީ ވެސް 730 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަސައްކަތެކެވެ.
މީގެ އިތުރުން ގޮއިދޫ މަގުހެދުމުގެ މަސައްކަތް އާރްޑީސީއާއި ހަވާލުކޮށްފައިވަނީ މިދިޔަ އަހަރުގެ އޮކްޓޫބަރ މަހުގެ 25 ވަނަ ދުވަހުއެވެ. މި މަޝްރޫއުގެ ދަށުން 10 މަގެއްގައި ތާރު އަޅައިގެން ޒަމާނީ ފެންވަރަށް ތަރައްގީކުރުމަށް ވަނީ ހަމަޖެހިފައެވެ. މި މަޝްރޫއަށް ޖުމުލަ 72.6 މިލިޔަން ރުފިޔާ ހަރަދުވާއިރު މަސައްކަތް ނިންމުމަށް ހަމަޖެހިފައިވަނީ 730 ދުވަހުގެ ތެރޭގައެވެ.
މި 3 މަޝްރޫއުގެ ދަށުން މަގުގެ ދުވާރު ހެދުމާއި، މަގު ބައްތި ޖެހުމާއި ފެންހިނދާ ނިޒާމު ގާއިމުކުރުމުގެ މަސައްކަތް ކުރުމަށް ވަނީ ހަމަޖެހިފައެވެ.
