މާލޭގެ މޭޔަރު އާދަމް އާޒިމަށް ހަމަލާދޭން އުޅުނު މައްސަލަ ފުލުހުން ތަހުގީގުކުރަން ފަށައިފިއެވެ.
މޭޔަރު އާޒިމަށް ހަމަލާދޭން މީހަކު މަސައްކަތް ކުރީ މި މަހުގެ 24 ވަނަ ދުވަހު އެމްޑީޕީން މާލޭގައި ބޭއްވި މުޒާހަރާގެ ތެރެއިންނެވެ.
އެ މައްސަލައާ ގުޅިގެން ފުލުހުން މިއަދު ބުނީ، އާޒިމަށް ހަމަލާދޭން އުޅުނު ކަމަށް ތުހުމަތުވާ މައްސަލަ އެ އިދާރާއިން ބަލަމުން އަންނަ ކަމަށެވެ.
ފުލުހުން ބުނީ މި މައްސަލައާ ގުޅިގެން މިހާތަނަށް އަދި އެއްވެސް މީހަކު ހައްޔަރުކޮށްފައިނުވާ ކަމަށެވެ.
އެނގިފައިވާ ގޮތުގައި އެ މައްސަލަ އާޒިމްގެ ފަރާތުންވެސް އަދި އެމްޑީޕީންވެސް އަދި ސިޓީ ކައުންސިލުންވެސް ފުލުހުންނަށް ހުށަހަޅާފައެއް ނުވެއެވެ.
އާޒިމަށް ހަމަލާދޭން އުޅުނު މައްސަލަ އެމްޑީޕީންނާއި ރައީސް ޑރ. މުހައްމަދު މުއިއްޒުވެސް ވަނީ ހަރުކަށި އިބާރާތުން ކުށްވެރިކޮށްފައިވާއިރު ރޭ ސަރުކާރުން ނެރުނު ބަޔާނެއްްގައި ވަނީ އެ މައްސަލަ ފުުލުހުންގެ އަމިއްލަ އިސް ނެގުމަށް ބަލަމުން އަންނަ ކަމަށް ބުނެފައެވެ. އެކަން ފުލުހުންވެސް ވަނީ ”އެކި“ އަށް މިއަދު ކަށަވަރުކޮށްދީފައެވެ.
މީގެ އިތުރުން އެ ހަމަލާގެ ފަހަތުގައި އޮތީ ސަރުކާރު ކަމަށް މޭޔަރު އާޒިމް ތުހުމަތުކުރެއްވުމުން، އެކަން ކުށްވެރިކޮށް، ސަރުކާރުން ވަނީ ކަންބޮޑުވުން ފާޅުކޮށްފައެވެ.
