ބިންކޮނުމުގެ މަސައްކަތް ކުރާއިރު، ބިމުގެ އަޑީގައި ވަޅުލާފައިވާ ކަރަންޓު ކޭބަލްތަކަށް ގެއްލުން ނުވާނޭހެން މަސައްކަތް ކުރުމަށާއި, އެފަދަ ގެއްލުމެއް ލިބިއްޖެ ހާލަތެއްގައި އެކަން ސިއްރު ނުކޮށް ވީހާވެސް އަވަހަށް އެކަން އެންގުމަށް ސްޓެލްކޯއިން އިލްތިމާސްކޮށްފިއެވެ.
ހުޅުމާލެ ދެވަނަ ފިޔަވަހިން ތަކުރާރުކޮށް ކަރަންޓު ކެނޑޭ މައްސަލައާއި ގުޅިގެން ސްޓެލްކޯއިން ނެރުނު ނޫސްބަޔާނެއްގައި ބުނީ، ކަރަންޓު ކެނޑުމަށް މެދުވެރިވީ މަގުހެދުމުގެ މަސައްކަތް ކުރަމުންދިޔަ ބައެއްގެ އިހުމާލުން ކަރަންޓު ކޭބަލަކަށް ލިބުނު ގެއްލުމުގެ ސަބަބުން ކަމަށެވެ. ކަރަންޓު ކެނޑުމާއެކު ސްޓެލްކޯގެ ޓެކްނިކަލް ޓީމުން ކުޑައިރުކޮޅެއްގެ ތެރޭގައި ހުރިހާ ސަރަހައްދަކަށް ކަރަންޓު ދީފައިވާ ކަމަށް އެ ކުންފުނިން ވަނީ މައުލޫމާތު ދީފައެވެ.
ނޫސްބަޔާން: ހުޅުމާލޭ ދެވަނަ ފިޔަވަހީގެ ކަރަންޓު ކޭބަލްތަކަށް ގެއްލުންވެ ޚިދުމަތަށް ބުރޫއެރުން! pic.twitter.com/sRwINqD7eY
— STELCO (@STELCOMALDIVES) April 25, 2026
މި މަހުގެ 12 ވަނަ ދުވަހު ވެސް ކޮނުމުގެ މަސައްކަތް ކުރި ބައެއްގެ އިހުމާލުން މައި ކޭބަލަކަށް ގެއްލުންވެ، އެ ސަރަހައްދުން ކަރަންޓު ކެނޑުނުކަން ފާހަގަކުރަމުން ސްޓެލްކޯއިން ބުނެފައިވަނީ، އެ ފަހަރު ކޭބަލަށް ލިބުނު ގެއްލުން ބެލުމަށް ފޯލްޓް ޑިޓެކްޓަރ ބޭނުންކޮށްގެން ކުރި މަސައްކަތުން، ކޭބަލްގެ އެހެން ދިމާލަކަށް މީގެ ކުރިން ގެއްލުން ލިބިފައިވާކަން އެނގިފައިވާ ކަމަށެވެ. އަދި ލިބިފައިވާ ގެއްލުން އެ ކުންފުންޏަށް ރިޕޯޓްކުރުމުގެ ބަދަލުގައި، ކޭބަލްގައި ޓޭޕް އޮޅައި އެކަން ސިއްރުކޮށްފައިވާކަން ފާހަގަކުރެވިފައިވާ ކަމަށް ސްޓެލްކޯއިން ވަނީ ބުނެފައެވެ.
މިފަދަ ޒިންމާދާރުކަން ކުޑަ އަމަލުތަކުގެ ސަބަބުން އެ ސަރަހައްދުގައި ދިރިއުޅޭ ރައްޔިތުންނަށް ރައްޔިތުންނަށް ބޮޑެތި ތަކުލީފުތަކެއް އުފުލަންޖެހޭ ކަމަށާއި، މި މައްސަލަ ހައްލު ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއިއެކު މަޝްވަރާ ކުރެވިފައިވާ ކަމަށް ސްޓެލްކޯއިން ބުންޏެވެ.
ކަރަންޓުގެ ހިދުމަތް މެދުކެނޑުމުގެ ސަބަބުން ކަސްޓަމަރުންނަށް ދިމާވި ދަތިތަކަށް ސްޓެލްކޯއިން ވަނީ މައާފަށް އެދިފައެވެ.
