ވޮޝިންގޓަން، ޑީސީ: އެމެރިކާގެ ވޮޝިންގޓަން ޑީސީގެ ހޮޓަލެއްގައި ބޭއްވި ވައިޓް ހައުސްގެ ކޮރެސްޕޮންޑެންޓުންގެ އަހަރީ ފަރިއްކޮޅުގެ ތެރޭގައި ބަޑިޖަހައި، ސަލާމަތީ ފިޔަވަޅުތައް މުގުރާލަން އުޅުނު މީހަކު ސަލާމަތީ ބާރުތަކުން ހައްޔަރުކޮށްފިއެވެ.
މި ހާދިސާ ހިނގުމާއެކު، އެމެރިކާގެ ރައީސް ޑޮނަލްޑް ޓްރަމްޕް އަދި ފަސްޓްލޭޑީ ވަނީ ވަގުތުން އެ ތަނުން ރައްކާތެރި ހިސާބަކަށް ގެންގޮސްފައެވެ. އެ ޤައުމުގެ ފުލުހުންނާ ހަވާލާދީ މީޑިއާތަކުން ރިޕޯޓު ކުރިގޮތުގައި މި މި ހާދިސާއާ ގުޅިގެން ހައްޔަރުކުރި މީހަކީ އުމުރުން 31 އަހަރުގެ ކޯލް ތޯމަސް އެލަން ނަމަކަށް ކިޔާ މީހެކެވެ. އޭނާ އަކީ ކެލިފޯނިއާއަށް ނިސްބަތްވާ ފިރިހެނެކެވެ.
މި ހާދިސާއާ ގުޅޭގޮތުން ވާހަކަފުޅު ދައްކަވަމުން ރައީސް ޓްރަމްޕް ވިދާޅުވީ، ހައްޔަރުކުރި މީހާ ހުރީ ވަރަށް ބޮޑަށް ހަތިޔާރު އަޅައިގެން ކަމަށާއި، ބެލެވޭ ގޮތުގައި އޭނާ މި އަމަލު ހިންގީ އެކަނި ކަމަށެވެ. މި ހާދިސާގެ ތެރޭގައި ސަލާމަތީ ހިދުމަތުގެ އޭޖެންޓެއްގެ ގަޔަށް ބަޑިޖަހާފައިވާ ކަމަށާއި، ނަމަވެސް އޭނާއަށް ލިބުނު އަނިޔާއިން ސަލާމަތްވެ ހާލު ރަނގަޅު ކަމަށް ރައީސް ވިދާޅުވިއެވެ. މަޢުލޫމާތުލިބޭގޮތުގައި އޭޖެންޓްހުރީ ބުލެޓް ޕްރޫފް ވެސްޓްލައިގެންނެވެ.
މި ހާދިސާއާ ގުޅިގެން މެދުކަނޑާލަން ޖެހުނު ވައިޓް ހައުސް ކޮރެސްޕޮންޑެންޓުންގެ ފަރިއްކޮޅު، ކުރިއަށް އޮތް 30 ދުވަހުގެ ތެރޭގައި އަލުން ބޭއްވުމަށް މިހާރު ވަނީ ތާވަލުކޮށްފައެވެ. ސަލާމަތީ ބާރުތަކުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
