އިދިކޮޅު އެމްޑީޕީން ރޭ މާލޭގައި ކުރިއަށް ގެންދިޔަ މުޒާހަރާގެ ތެރެއިން މާލެ ސިޓީގެ މޭޔަރު އާދަމް އާޒިމަށް އަމާޒުކޮށް ދިން ހަމަލާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހަރުކަށި އިބާރާތުން ކުށްވެރިކުރައްވައިފިއެވެ. މީގެ އިތުރުން ސިޔާސީ ހުރިހާ ޕާޓީއަކުންހެން މިކަން ކުށްވެެރިކޮށްފިއެވެ. އެހެންނަމަވެސް، މި ހާދިސާ ހިނގިތާ ގިނަ ވަގުތުތަކެއް ވެގެންދިޔައިރުވެސް، އާޒިމް ނިސްބަތްވެ ވަޑައިގަންނަވާ އެމްޑީޕީގެ ފަރާތުން ނުވަތަ މާލެ ސިޓީ ކައުންސިލުން ވެސް މި މައްސަލަ ރަސްމީކޮށް ފުލުހަށް ހުށަހަޅާފައި ނުވާތީ ސަރުކާރުން ވަނީ ކަންބޮޑުވުން ފާޅުކޮށްފައެވެ.
މިކަމާ ގުޅޭގޮތުން މައުލޫމާތު ދެއްވަމުން ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވީ، މިފަދަ ނުރައްކާތެރި ހާދިސާއެއް ހިނގާދިޔައިރުވެސް އެއްވެސް ރަސްމީ ފަރާތަކުން ފުލުހުންނަށް މައުލޫމާތު ހިއްސާކޮށްފައި ނުވާތީ އެކަމާ ހިތާމަކުރައްވާ ކަމަށެވެ. މުޖުތަމައުގެ ސަލާމަތާއި ރައްކާތެރިކަން ކަށަވަރުކުރުމުގެ ގާނޫނީ މަސްއޫލިއްޔަތު މަތިކޮށްފައިވާ މުއައްސަސާއަކީ ފުލުހުން ކަމަށްވާއިރު، މިފަދަ ހާދިސާތައް ރިޕޯޓުނުކުރުމަކީ ފުލުހުންގެ ޒިންމާ އަދާކުރުމަށް އެޅޭ ހުރަހެއް ކަމަށް އޭނާ ފާހަގަކުރެއްވިއެވެ.
މުންދު އިތުރަށް ވިދާޅުވީ، މީސް މީޑިއާގައި ދައުރުވި ވީޑިއޯ ފުލުހުންނަށް ފެނުނު ހިސާބުން، ފުލުހުންގެ އަމިއްލަ އިސްނެގުމުގެ މަތިން މިހާރު މި މައްސަލަ ތަހުގީގު ކުރަން ފަށާފައިވާ ކަމަށެވެ.
ދައުލަތުގެ އިސް މަގާމުތަކުގައި ތިއްބަވާ ބޭފުޅުންގެ ސެކިއުރިޓީއާ ގުޅޭގޮތުން ވާހަކަ ދައްކަވަމުން މުންދު ވިދާޅުވީ، މާލެ ސިޓީގެ މޭޔަރަކީ އެދިވަޑައިގެންފިނަމަ ސެކިއުރިޓީ ލިބޭނެ ފަރާތެއް ކަމަށެވެ. އަދި ދައުލަތުގެ އިސް ބޭފުޅުންނަށް އޮތް ނުރައްކާ ދެނެގަތުމަށް ފުލުހުން އަބަދުވެސް ”ތްރެޓް އެސެސްމަންޓް“ ހަދަމުންދާ ކަމަށާއި، އެފަދަ އެސެސްމަންޓަކުން އެއްވެސް ބޭފުޅަކަށް ނުރައްކަލެއް އޮތްކަން ފާހަގަކުރެވިއްޖެނަމަ ފުލުހުން އިސްވެ ސެކިއުރިޓީ ހަމަޖައްސައިދޭނެ ކަމަށްވެސް އޭނާ ވިދާޅުވިއެވެ.
މި ހާދިސާއާ ގުޅިގެން އާންމުންގެ ގިނަ ބައެއްގެ ފާޑުކިޔުން އެމްޑީޕީއަށް ވަނީ އަމާޒުވެފައެވެ. މާޒީގައި މިފަދަ ހަމަލާތަކަކީ އެމްޑީޕީގެ އެކްޓިވިސްޓުން ލައްވައި އެ ޕާޓީން ރާވައިގެން ކުރުވާ ކަންކަން ކަމަށް ތުހުމަތުކޮށް، މިއީ ވެސް ސިޔާސީ މަންފާއެއް ހޯދުމަށް ހިންގާފައިވާ ރޭވުމެއް ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ޝުއޫރު ފާޅުކުރަމުންނެވެ. އެހެންކަމުން، މި މައްސަލަ ފުލުހަށް ހުށަނޭޅުމަކީ އެ ޕާޓީގެ އިޚްލާޞްތެރިކަމާ މެދު ސުވާލު އުފެދޭ ކަމެއްގެ ގޮތުގައި އާންމުން ދަނީ ސިފަކުރަމުންނެވެ.
