މާލެ ސިޓީގައި 500 ސޯޝަލް ހައުސިންގ ޔުނިޓު ތަރައްގީކުރުމަށް ޗައިނާއާއެކު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކޮށްފައިވަނީ، ބެއިޖިންގައި ކުރިއަށްގެންދިޔަ ”ހައި ލެވެލް ކޮންފަރެންސް އޮން ގްލޯބަލް އެކްޝަން ފޯރ ޝެއަރޑް ޑިވެލޮޕްމަންޓް“ގެ ހަވާސާގައި ކުރިއަށްދިޔަ މަޝްވަރާތަކުގެ ”މިނިޓްސް އޮފް ދަ މީޓިންގ“ ގައެވެ.
ޗައިނާގެ ވެރިރަށް ބެއިޖިންގގައި މި މަހުގެ 21 ވަނަ ދުވަހުން ފެށިގެން 22 ވަނަ ދުވަހުގެ ނިޔަލަށް ކުރިއަށްގެންދިޔަ ”ހައި ލެވެލް ކޮންފަރެންސް އޮން ގްލޯބަލް އެކްޝަން ފޯރ ޝެއަރޑް ޑިވެލޮޕްމަންޓް“ގެ ހަވާސާގެ ތެރެއިން ވަނީ މާލެ ސިޓީގައި ޗައިނާގެ އެހީތެރިކަމާއެކު 500 ސޯޝަލް ހައުސިންގ ޔުނިޓު ތަރައްގީކުރުމަށް ފުޅާ ދާއިރާއެއްގައި މަޝްވަރާކޮށްފައެވެ.
އެގޮތުން މި މަޝްވަރާތަކުގެ އަލީގައި މި މަޝްރޫއު ކުރިއަށްގެންދިޔުމުގައި ދެ ގައުމަށް އެއްބަސްވެވުނު ކަންތައްތަކުގެ ”މިނިޓްސް އޮފް ދަ މީޓިންގ“ގައި ވަނީ ސޮއިކޮށްފައެވެ. މިކަމާ ގުޅިގެން ހައުސިންގ މިނިސްޓްރީން ބުނެފައިވަނީ، މާލެ ސިޓީގައި ސޯޝަލް ހައުސިންގ ޔުނިޓުތައް ތަރައްގީކުރުމަށް ކުރިއަށްގެންދާ މި މަޝްރޫއުގެ ފައިނޭންސް ހަމަޖެއްސުމަށް ޗައިނާއިން އެއްބަސްވެފައިވަނީ އިންޓްރެސްޓަކާއި ނުލައި ދޭ އެހީގެ ގޮތުގައި ކަމަށެވެ.
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ހައުސިންގ މިނިސްޓްރީގެ ސްޓޭޓް މިނިސްޓަރު އިބްރާހީމް ޠޮއާމް މުޙައްމަދުއެވެ. އަދި ޗައިނާ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އޭޖެންސީގެ ޗެއަރމަން ލިޔު ޖުންފެންގއެވެ.
ހައުސިންގ މިނިސްޓްރީން އިތުރަށް ބުނެފައިވަނީ، ޗައިނާގެ އެހީގައި ރާއްޖޭގައި ކުރިއަށްގެންދާ ތަރައްގީގެ މަޝްރޫއުތަކާއި ގުޅިގެން އިތުރު ބައްދަލުވުމެއް ވެސް ބާއްވާފައިވާ ކަމަށެވެ. ހައުސިންގ މިނިސްޓްރީން ވަނީ މަޝްރޫއުތައް ނުހުއްޓި ކުރިއަށްގެންދިޔުމާއި ގުޅޭގޮތުން ދެ ފަރާތުން ވެސް އެއްބާރުލުން ދޭނެކަމުގެ ޔަގީންކަން ދީފައެވެ.
