މި އަހަރުގެ ފުރަތަމަ ކުއާޓަރގައި ރާއްޖެއިން ބޭރަށް 1.04 ބިލިއަން ޑޮލަރު ފޮނުވާފައިވާ ކަމަށް ބޭންކް އޮފް މޯލްޑިވްސް (ބީއެމްއެލް) އިން ހާމަކޮށްފިއެވެ. އެ ބޭންކުން ބުނީ މި އަހަރުގެ ފުރަތަމަ ކުއާޓަރގައި ޓީޓީއަށް ދޫކޮށްފައިވާ ޑޮލަރުގެ އަދަދު ވެސް އިތުރުވެފައިވާ ކަމަށެވެ.
ހުސްވި 2025 ވަނަ އަހަރު ބީއެމްއެލްއިން ކޮށްފައިވާ ކްރޮސްބޯޑަރ ޓްރާންސެކްޝަނަށް ބަލައިލާއިރު ރާއްޖެއިން ބޭރުން އެތެރެވި ފައިސާގެ އަދަދަކީ 3.69 ބިލިއަން ޑޮލަރެވެ. އަދި ރާއްޖެއިން ބޭރަށް ފޮނުވި ފައިސާގެ އަދަދަކީ 3.28 ބިލިއަން ޑޮލަރު ކަމަށް ބީއެމްއެލްއިން ވަނީ ބުނެފައެވެ.
މި އަހަރުގެ ފުރަތަމަ ކުއާޓަރގެ ތަފާސްހިސާބުތަކަށް ބަލައިލާއިރު، ރާއްޖެއިން ބޭރުން އެތެރެވި ފައިސާގެ އަދަދު 1.27 ބިލިއަން ޑޮލަރުގައި ހުރި އިރު، ރާއްޖެއިން ބޭރަށް ފޮނުވާފައިވާ ފައިސާގެ އަދަދު ހުރީ 1.04 ބިލިއަން ޑޮލަރުގައެވެ.
މި އަހަރުގެ ފުރަތަމަ ކުއާޓަރގައި ޓީޓީއަށް 106.2 މިލިޔަން ޑޮލަރު ވަނީ ވިއްކައިފައެވެ. ނަމަވެސް މިދިޔަ އަހަރު މަހެއްގެ މައްޗަށް އެ ބޭންކުން ވިއްކާފައިވަނީ، 14.6 މިލިއަން ޑޮލަރެވެ. މި އަހަރުގެ ފުރަތަމަ ކުއާޓަރއަށް ބަލާލާއިރު، އެ ބޭންކުން ވަނީ މަހެއްގެ މައްވަށް 35.4 މިލިއަން ޑޮލަރުގެ ޓީޓީ ވިއްކައިފައެވެ.
މީގެ އިތުރުން މިދިޔަ 2025 ވަނަ އަހަރު ބީއެމްއެލްއިން ވަނީ ކާޑުތަކަށް މަހެއްގެ މައްޗަށް 32.5 މިލިއަން ޑޮލަރު ދޫކޮށްފައެވެ. އަދި މި އަހަރުގެ ފުރަތަމަ ކުއާޓަރގައި މަހެއްގެ މައްޗަށް ކާޑުތަކަށް ދޫކޮށްފައިވަނީ 40 މިލިއަން ޑޮލަރު ކަމަށް އެ ބޭންކުން ވަނީ އިތުރަށް މައުލޫމާތު ދީފައެވެ.
