ހުސްވި މާރިޗު މަހު ރާއްޖެއިން އެކްސްޕޯރޓް ކޮށްފައިވާ މަހުގެ އަދަދު އިތުރުވެއްޖެއެވެ.
މޯލްޑިވްސް ކަސްޓަމްސް ސަރވިސްގެ ތަފާސްހިސާބުތައް ދައްކާގޮތުގައި މިދިޔަ މަހު 69 މިލިއަން ރުފިޔާގެ މަސް ރާއްޖެއިން އެކްސްޕޯރޓް ކޮށްފައިވާއިރު، ފެބްރުއަރީ މަހު ރާއްޖެއިން އެކްސްޕޯރޓް ކޮށްފައިވަނީ 51 މިލިއަން ރުފިޔާގެ މަހެވެ. އެހެންކަމުން މި މަހު ރާއްޖެއިން އެކްސްޕޯޓުކޮށްފައިވާ މަހުގެ އަދަދު ވަނީ %35 އިތުރުވެފައެވެ.
މައިގަނޑުގޮތެއްގައި ރާއްޖެއިން އެކްސްޕޯރޓު ކުރަނީ ކަނޑުމަހުގެ ދެ ބާވަތް ކަމަށްވާ ކަޅުބިލަމަހާއި ރީނދޫ އުރަހަ ކަންނެއްޏެވެ. ރާއްޖެއިން ތިން ގޮތަކަށް ކަޅުބިލަ މަސް އެކްސްޕޯރޓް ކުރެއެވެ. އެއީ ގަނޑުކޮށްގެން، ތާޒާކޮށް އަދި ދަޅުގައި ބަންދުކޮށްގެންނެވެ. ކަސްޓަމްސްގެ ތަފާސްހިސާބުތައް ދައްކާގޮތުގައި ދަޅުގައި ބަންދުކޮށްގެން ކަޅުބިލަމަސް އެކްސްޕޯރޓް ކޮށްފައިވާ މިންވަރު މިދިޔަ މަހު ވަނީ %75 އިތުރުވެފައެވެ.
ފެބުރުއަރީ މަހު މި އަދަދު ހުރީ 29 މިލިއަން ރުފިޔާގައި ނަމަވެސް މި ހިނގާ މާރިޗު މަހު ވަނީ މި އަދަދު 51 މިލިއަން ރުފިޔާއަށް އިތުރުވެފައެވެ. މާރިޗު މަހު ރާއްޖެއިން އެކްސްޕޯޓް ކުރި މަހުގެ ބާވަތްތަކާއި ލިބުނު އާމްދަނީ:
- ދަޅު މަސް: 51 މިލިއަން ރުފިޔާ
- ގަނޑުކުރި ކަޅުބިލަ މަސް: 8 މިލިއަން ރުފިޔާ
- ތާޒާ ކަންނެލި މަސް: 6 މިލިއަން ރުފިޔާ
ރާއްޖެއިން ބޭރު ކުރާ މުދަލުގެ އެންމެ ބޮޑު ބައެއް ހިއްސާކުރަނީ މަހުގެ ބާވަތްތަކެވެ. ކަން މިހެން އޮތް އިރު ރާއްޖޭގެ މަސްވެރިކަމުން ލިބޭ އާމްދަނީ އިތުރުކުރުމަކީ މި ސަރުކާރުން ވަރަށް އިސްކަމެއްދީގެން ކުރަމުން އަންނަ މަސައްކަތެކެވެ. އެގޮތުން މަސް ޕްރޮސެސިންގ ކެޕޭސިޓީ އިތުރުކޮށް މަސް ރައްކާކުރުމުގެ ކެޕޭސިޓީ އިތުރުކުރުން ފަދަ މަސައްކަތްތައް މީގެ ތެރޭގައި ހިމެނެއެވެ.
