ރިޒާވް ބޭންކް އޮފް އިންޑިއާ (އާރް.ބީ.އައި) އިން ދިވެހިރާއްޖެއަށް ދޫކޮށްފައިވާ 400 މިލިއަން އެމެރިކާ ޑޮލަރުގެ ލޯނު، މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން މިއަދު ދައްކާ ޚަލާސްކޮށްފިއެވެ.
ޚާރިޖީ ވުޒާރާއިން މިއަދު ނެރުނު ބަޔާނެއްގައި ވިދާޅުވެފައިވަނީ، މި ލޯނަކީ 2024 ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށް ކުރެއްވި ރަސްމީ ދަތުރުފުޅުގެ ތެރެއިން ޤާއިމްކުރި ކަރަންސީ ސްވޮޕް އެއްބަސްވުމެއްގެ ދަށުން ނަގާފައިވާ ފައިސާ ކަމަށެވެ. މި ލޯނު ދައްކަންޖެހޭ ސުންގަޑި ހަމަވިއިރު، ރާއްޖެއިން ވަނީ އެ ފައިސާ އެއްކޮށް ދައްކާ ނިންމާފައެވެ.
މި 400 މިލިއަން ޑޮލަރުގެ ލޯނު ދައްކާފައިވާއިރު، ރާއްޖޭގެ މާލީ ހާލަތު ރަނގަޅު ކުރުމަށް އެހީތެރިވުމުގެ ގޮތުން އިންޑިއާއިން މިހާރު ވަނީ އިތުރު 30 ބިލިއަން އިންޑިއާ ރުޕީސް (ގާތްގަނޑަކަށް 319 މިލިއަން އެމެރިކާ ޑޮލަރު) ގެ ލޯނެއް ރާއްޖެއަށް ހަމަޖައްސައިދީފައެވެ. އިންޑިއާ ސަރުކާރުން ވެދެއްވި މި އެހީތެރިކަމަށްޓަކައި ދިވެހި ސަރުކާރުން ވަނީ އެ ޤައުމަށް ޝުކުރު އަދާކުރައްވާފައެވެ. އަދި ރާއްޖޭގެ ތަރައްޤީގައި އިންޑިއާއިން އަދާކުރަމުންދާ މުހިންމު ދައުރު ސަރުކާރުން ވަނީ ފާހަގަކުރައްވާފައެވެ.
ސަރުކާރުން ހާމަކުރެއްވި ގޮތުގައި، އަލަށް ހަމަޖެހުނު 319 މިލިއަން ޑޮލަރުގެ ލޯނުގެ ސަބަބުން މިވަގުތު ރާއްޖެއަށް ކުރިމަތިވަމުންދާ މާލީ ދަތިތަކަށް ބޮޑު ލުޔެއް ލިބި، އިޤްތިޞާދީ ތަރައްޤީގެ މަޝްރޫޢުތައް ކުރިއަށް ގެންދިއުމަށް މަގުފަހިވެގެންދާނެއެވެ.
މީގެ އިތުރުން، 2019 ވަނަ އަހަރު ސްޓޭޓް ބޭންކް އޮފް އިންޑިއާ (އެސް.ބީ.އައި) މެދުވެރިކޮށް ރާއްޖެއަށް ހަމަޖައްސައިދިން 150 މިލިއަން ޑޮލަރުގެ ތެރެއިން ބާކީ އޮތް 50 މިލިއަން ޑޮލަރުވެސް މި ސަރުކާރުން ވަނީ ދައްކާ ޚަލާސްކޮށްފައެވެ. މިއީ ރާއްޖޭގެ ބޭރުގެ ދަރަނި އަދާކުރުމުގައި ސަރުކާރުން ދެއްވާ އިސްކަން ހާމަކޮށްދޭ ކަމެއްގެ ގޮތުގައި ޚާރިޖީ ވުޒާރާއިން ފާހަގަކުރައްވައެވެ.
