މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ޑެޕިއުޓީ މެނޭޖިންގ ޑިރެކްޓަރު މުޙައްމަދު ލަމްއާންގެ ފޮޓޯ ޖަހައިގެން، މީހެއްގެ މަރާ ގުޅުވައިގެން ދައްކަމުންދަނީ އެއްވެސް ހަގީގަތެެއް ނެތް ދޮގު ވާހަކަތަކެއް ކަމަށް އޭނާ ވިދާޅުވެއްޖެއެވެ.
ލަމްއާން މި މޭރުމުން ވިދާޅުވީ، ހަސަން ކުރުސީގެ ނަމުގައި ކާކުކަން ނޭނގޭ ގޮތަށް އެކްސްގައި ހިންގަމުން އަންނަ އެކައުންޓަކުން ކޮށްފައިވާ ޕޯސްޓަކާ ގުޅިގެން އެކަމަށް ރައްދުދެއްވަމުންނެވެ. މި ޕޯސްޓާއި ގުޅިގެން ލަމްއާން ވިދާޅުވީ، އިންސާނެއްގެ މަރާއި އަޅުވާ އެއްވެސް ހަގީގަތެއް ނެތް ވާހަކަތަކެއް އޭނާގެ ފޮޓޯ ޖަހައިގެން ހަސަން ކުރުސީގެ ނަމުގައި ހިންގަމުން އަންނަ އެކައުންޓުން ދައްކަމުން އަންނަ ވާހަކަތައް ހަރުކަށި އިބާރާތުން ކުށްވެރި ކުރާ ކަމަށެވެ.
އިންސާނެއްގެ މަރާއި އަޅުވާ އެއްވެސް ހަޤީޤަތެއްނެތް ވާހަކަ އަޅުގަނޑުގެ ފޮޓޯ ޖަހައިގެން ހަސަންކުރުސީއޭކިޔާ އެކްސް އެކައުންޓުން ޕޯސްޓްކޮށްގެން ދައްކާ ވާހަކަ ހަރުކަށި އިބާރާތުން ކުށްވެރިކޮށް އެފަދަ ހަޤީޤަތެއް ނެތް ވާހަކަ ނުދެއްކުމަށް ނަސޭހަތްތެރިވަމެވެ. @Mihaarunews @Javiyani_MV
— Lam’aan (@mohamedlamaan) April 23, 2026
ހަސަން ކުރުސީގެ ނަމުގައި ހިންގަމުން އަންނަ އެ އެކައުންޓުން ވަނީ މި މަހުގެ 21 ވަނަ ދުވަހު ދަންޖެހިގެން އަމިއްލައަށް މަރުވި ގއ. ވިލިނގިލި / ހިކިދުބުރިމާގެ އަޙްމަދު ޢަމްރޫގެ މަރާއި އެމްއޭސީއެލްގެ މުވައްޒަފުން އޭނާއަށް ބުލީކުރުމާއި ގުޅުވައިގެން ވާހަކަދައްކައިފައެވެ. އެ ޕޯސްޓުގައި ބުނެފައިވާ ގޮތުގައި، އެމްއޭސީއެލްގެ ސީނިއަރ ލީޑަރޝިޕުން އެ ކުންފުނީގެ މުވައްޒަފުންނަށް ޢަމްރޫގެ ޖަނާޒާއަށް ނުދިއުމަށް އަންގާފައިވާ ކަމަށް ވަނީ ބުނެފައެވެ. މީގެ އިތުރުން ގދ. ތިނަދޫގައި ފެނަކަ މުވައްޒަފަކު ނިޔާވި މައްސަލައިގެ މައުލޫމާތު އޮޅުވާލައިގެންވެސް ކުރުސީ އެކައުންޓުން ވަނީ އާންމުކޮށްފައެވެ.
މީގެ އިތުރުން އެމްއޭސީއެލްގެ މާކެޓިންގ ޓީމުން އޭނާއަށާއި އޭނާގެ އާއިލާއަށް ތައުޒިޔާގެ މެސެޖެއް ވެސް ފޮނުވާފައިނުވާ ކަމަށް ބުނެ ވަނީ ވާހަކަދައްކައިފައެވެ. ނަމަވެސް ”އެކި އެމްވީ“ އަށް މައުލޫމާތު ލިބިފައިވާ ގޮތުގައި ޢަމްރޫއަކީ އެމްއޭސީއެލްގައި މަސައްކަތް ކުރަމުން އަންނަ މުވައްޒަފެއް ވެސް ނޫނެވެ. އަދި ތިނަދޫ ހާދިސާ އަކީވެސް އެމްއޭސީއެލްއާއި އެއްވެސް ގުޅުމެއްހުރި ހާދިސާއެއްނޫނެވެ.
މިވާހަކަ އެންމެ ފުރަތަމަ އެކްސްގައި ޕޯސްޓުކުރީ އެމްޑީޕީގެ ވަކީލު އަދި އެޕާޓީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފް އެވެ. އެއަށްފަހު އެކަމަށް މަޢާފަށްވެސް ނޭދި އޭނާ ވަނީ އެ ޕޯސްޓް ފޮހެލާފައެވެ. މިކަމާއި ގުޅިގެން ”އެކިއެމްވީ“ އިން ސުވާލު ކުރުމުން މައުރޫފް ބުނީ ”ތިޔައީ އެމްއޭސީއެލް އެފިލިއޭޓެޑް މީޑިއާއެއްތޯ“ އެވެ. އޭނާކުރި ވިޔާނުދާ ޢަމަލުގެ ވާހަކަ ދެއްކުމަށް އިންކާރުކުރައްވާ އިތުރުފުޅު ހެއްދެވިއެވެ.
ފާހަގަކޮށްލެވޭ ގޮތުގައި ހަސަން ކުރުސީގެ ނަމުގައި މީސް މީޑިއާގެ އެކި މަންސަތަކުގައި ހިންގަމުން އަންނަ އެކައުންޓްތަކަކީ ހަގީގަތާއި ހިލާފު ދޮގު އެތަކެއް ވާހަކަތަކެއް ފަތުރަމުން އަންނަ އެކައުންޓުތަކެކެވެ. އަދި މިއީ އެތައް ބަޔަކަށް ގަނާކޮށް ފުރައްސާރަކުރުމަށް ދެވިހިފާފައިވާ އެކައުންޓު ތަކެކެވެ. މީގެ ކުރިން ވެސް މީނާ މިފަދަ ވާހަކަތައް ދެއްކުމުގެ ސަބަބުން ހޫނު ފެނަށް ވެއްޓި، އާންމުންގެ ކިބައިން މައާފަށް ވެސް އެދިފައިވެއެވެ.
