ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ލޯކަލް ގަވަމަންޓް އޮތޯރިޓީ (އެލްޖީއޭ) ގެ ރައީސްކަމުގެ މަގާމަށް ފިނޭންސް މިނިސްޓަރު މޫސާ ޒަމީރު މިއަދު އައްޔަންކުރައްވައިފިއެވެ.
އެލްޖީއޭގެ ރައީސްކަމުގެ މަގާމަށް މިނިސްޓަރު ޒަމީރު އައްޔަންކުރެއްވުމާ ގުޅިގެން އެލްޖީއޭއިން ވަނީ ޒަމީރަށް މަރުހަބާ ވިދާޅުވެ އެކްސްގައި ޕޯސްޓެއް ހިއްސާކުރައްވައިފައެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން، އެލްޖީއޭގެ ރައީސްކަމުގެ މަގާމަށް ބޭފުޅަކު އައްޔަންކުރުމުގެ ބާރު ލިބިދީފައިވަނީ ރައީސުލްޖުމްހޫރިއްޔާއަށެވެ. ގާނޫނު ބަޔާންކޮށްފައިވާ ގޮތުން، މަޖިލީހަށް ޖަވާބުދާރީވުމުގެ ގޮތުން އެލްޖީއޭގެ ބޯޑުގެ ރައީސްގެ މަގާމުގައި ހުންނަވަންވާނީ ވަޒީރުންގެ މަޖިލީހުގެ މެންބަރެކެވެ.
މީގެކުރިން އެލްޖީއޭގެ ރައީސްކަމުގައި ހުންނެވީ ސިޓީސް މިނިސްޓަރު އާދަމް ޝަރީފް ޢުމަރުއެވެ. ނަމަވެސް ސަރުކާރު ހިންގެވުމަށް ބޮޑު ބަދަލެއް ގެންނަވަން ނިންމަވައި ރައީސް މުޢިއްޒު ވަނީ 20 މިނިސްޓްރީގެ ތެރެއިން ފަސް މިނިސްޓްރީއެއް އުވާލައްވައިފައެވެ. އޭގެ ތެރޭގައި ސިޓީސް މިނިސްޓްރީ ވެސް ހިމެނެއެވެ. އެހެންކަމުން އެލްޖީއޭގެ ރައީސްކަމުގެ މަގާމު މިހާރު ވަނީ ހުސްވެފައެވެ.
