ސްޓޭޓް ޓްރޭޑިންގ އޯގަނައިޒޭޝަން އެސްޓީއޯއިން މިދިޔަ 2025 ވަނަ އަހަރުގެ ތެރޭގައި ފަށާފައިވާ ބަންކަރިންގެ ހިދުމަތަށް މި އަހަރުގެ ފުރަތަމަ ކުއާޓާގައި ބޮޑު ކުރިއެރުމެއް ލިބިއްޖެއެވެ.
އެސްޓީއޯއިން އިއްޔެ އާންމުކުރި މި ހިނގާ 2026 ވަނަ އަހަރުގެ ފުރަތަމަ ކުއާޓާގެ ރިޕޯޓުގައިވާ ގޮތުން، މިދިޔަ 2025 ވަނަ އަހަރުގެ ފަހު ކުއާޓާގައި ވިއްކި އަދަދަށް ވުރެ އިތުރަށް 18 މިލިއަން ލީޓަރު (113،216.6 ފީފާ) ތެޔޮ މި އަހަރުގެ ފުރަތަމަ ކުއާޓާގައި ވަނީ ވިއްކައިފައެވެ.
މެދުއިރުމަތީގައި މިހާރު ހިނގަމުންދާ ހަނގުރާމަ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލުމުން އެސްޓީއޯއިން ވިއްކާ ތެލުގެ އަގު ވެސް ބޮޑުކުރިއެވެ. އެސްޓީއޯގެ ކުއާޓާލީ ރިޕޯޓުން ދައްކާ ގޮތުގައި، ތެލުގެ އަގު ބޮޑުވުމުގެ އިތުރުން ތެޔޮ ވިއްކުނު މިންވަރު ވެސް އިތުރުުވުމަކީ އެސްޓީއޯގެ އާމްދަނީ އިތުރުވުމަށް މެދުވެރިވި އެއްސަބަބެކެވެ. އެގޮތުން، މިދިޔަ އަހަރުގެ ފަހު ކުއާޓާގައި އެސްޓީއޯއިން ވިއްކި ތެލުގެ މިންވަރާ އަޅާބަލާއިރު މި ކުއާޓާގައި ވަނީ 27 އިންސައްތަ އިތުރުވެފައެވެ.
ފާހަގަކޮށްލެވޭ ގޮތުގައި އެސްޓީއޯއިން މި ކުއާޓާގައި 5.49 ބިލިއަން ރުފިޔާގެ ވިޔަފާރި ކޮށްފައިވާއިރު، ޖުމުލަ އާމްދަނީގެ ގޮތުގައި 785 މިލިއަން ރުފިޔާ ލިބިފައިވެއެވެ. މީގެ އިތުރުން ހަރަދަށާއި ޓެކުހަށް ކެނޑުމަށްފަހު ސާފު ފައިދާގެ ގޮތުގައި އެ ކުންފުންޏަށް ލިބިފައިވަނީ 276 މިލިއަން ރުފިޔާއެވެ. މިއީ މިދިޔަ އަހަރުގެ ފަހު ކުއާޓާއާ އަޅާބަލާއިރު 13 އިންސައްތަ އިތުރު އަދަދެކެވެ.
