ބަންގްލަދޭޝަށް ނިސްބަތްވާ ރައްޔިތެއް ކަމަށްވާ މުޙައްމަދު ލިޓަން މަރާލިކަމުގެ ކުށް ސާބިތުވެ، އޭނާ މަރާލިކަމުގެ ތުހުމަތުގައި ދައުވާ އުފުލާފައިވާ މުޙައްމަދު ނިޒާމް އުމުރު ދުވަހަށް ޖަލަށްލުމަށް ހުކުމްކޮށްފިއެވެ.
ނިޒާމާއި ލިޓަން ދަތުރުކުރި ތެޔޮ ބޯޓު ގެއްލިގެން ރިޕޯޓްކުރީ 2022 ވަނަ އަހަރުގެ ޑިސެމްބަރު މަހުގެ 28 ވަނަ ދުވަހެވެ. އޭގެ އަނެއް ދުވަހު ޑިސެމްބަރު މަހުގެ 29 ވަނަ ދުވަހު އެއަރޕޯޓް ނެރު ކައިރިން އެ ބޯޓު ފެނުނުއިރު އޭގައި އެއްވެސް މީހަކު ނެތް ކަމަށް ފުލުހުން އޭރު ބުންޏެވެ.
ފުލުހުން ބުނީ، އެ ދެ މީހުން ހޯދުމުގެ އޮޕަރޭޝަން ކުރިއަށް ދަނިކޮށް، ނިޒާމް ކަމަށް ބެލެވޭ މީހަކު މާލޭ ސިޓީގެ މަގުމަތިން ފެނިފައިވާ ކަމަށް ބުނެ މީހަކު އާންމު ކުރި ފޮޓޯއަކާއި ގުޅިގެން، ފުލުހުންގެ ތަހުގީގުގެ ބޭނުމަށް ނިޒާމް ފުލުހުންގެ ބެލުމުގެ ދަށަށް ގެންދެވުނު ކަމަށެވެ.
އަދި އޭގެ ފަހުން ނިޒާމް ލިޓަން މަރާލައި ހަށިގަނޑު މޫދަށް އެއްލާލިކަމުގެ ތުހުމަތުކޮށް، ދައުލަތުން ވަނީ އޭނާގެ މައްޗަށް ދައުވާކޮށްފައެވެ. ދައުލަތުން ނިޒާމުގެ މައްޗަށް އުފުލީ އެނގިހުރެ މީހަކު މެރުމުގެ ކުށުގެ ދައުވާއާއި ވައްކަމުގެ ދައުވާ އަދި މަސްތުވާތަކެތި ބޭނުންކުރުމުގެ ކުށުގެ ދައުވާއެވެ.
މި ދައުވާގެ އަޑުއެހުންތައް މިހާރު ނިމިފައިވާއިރު، ކްރިމިނަލް ކޯޓުން ކުރި ހުކުމުގައި ބުނެފައިވަނީ، ބަންގްލަދޭޝަށް ނިސްބަތްވާ މުޙައްމަދު ލިޓަންގެ ހަށިގަނޑު މިހާތަނަށް ފެނިފައިނުވި ނަމަވެސް ކުރެވުނު ތަހުގީގުން ނިޒާމް، ލިޓަން މަރާލިކަން ސާބިތުވާ ކަމަށާއި އަދި އަދަބެއްގެ ގޮތުން އޭނާ އުމުރަށް ޖަލަށްލުމަށް ހުކުމްކުރާ ކަމަށެވެ.
