ރިސޯޓްތަކުގެ މުވައްޒަފުންނަށް ދިމާވާ މައްސަލަތަކަށް ހައްލު ހޯދައިދޭނީ އަދުގެ ސަރުކާރުން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ކޮންގްރެސް ޕާޓީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާޙު މިއަދު ވިދާޅުވެއްޖެއެވެ.
މެންބަރު ފަލާޙު މި މޭރުމުން ވިދާޅުވީ ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީގެ މެމްބަރު މަޢުރޫފް ޛާކިރު ވަޒީފާއާ ބެހޭ ގާނޫނަށް ހުށަހެޅުއްވި އިސްލާހަށް ބަހުސްކުރައްވަމުންނެވެ. ފަލާޙު ވިދާޅުވީ، ގާނޫނުތަކަށް އެފަދަ އިސްލާހުތައް ގެންނައިރުގައި ރާއްޖޭގެ އެހެން ގާނޫނުތަކާއި އިސްލާހުތަކާއި އެއްވެސް ވަރެއްގެ ފުށުއެރުމެއް ހުރޭތޯ ބަލަންޖެހޭ ކަމަށެވެ.
”ފަތުރުވެރިކަމަކީ ދިވެހި އިގްތިސާދުގެ ލޭނާރު މައިބަދަ، ދުނިޔޭގެ އިގްތިސާދަށް އަންނަ ކޮންމެ ބަދަލެއް އެ ދާއިރާގައި މަސައްކަތްކުރާ މުވައްޒަފުންނާއި އޯނަރުންނާއި ހުރިހާ ފަރާތްތަކަށް ކުރާނެ، މިހާރު ވެސް ދުނިޔޭގައި މި ދަނީ ވަރަށް ވަރުގަދަ ހަނގުރާމަތަކެއް ހިންގަމުން، އެކަމުގެ ސަބަބުން ރާއްޖެއަށް އަންނަ ފަތުރުވެރިންގެ އަދަދު ވަނީ 20 އިންސައްތަ ދަށްވެފައި،“ – ފަލާޙު ވިދާޅުވިއެވެ.
ރިސޯޓްތަކަށް އިންވެސްޓްކޮށްފައިވާ އިންވެސްޓަރުން އެބަތިބިކަން ފާހަގަކުރައްވަމުން ފަލާޙު ވިދާޅުވީ ރިސޯޓު އޯނަރުންނަކީ ބޮޑެތި ލޯނުތަކާއި ދަރަނިތައް ނަގައިގެން އިންވެސްޓްކޮށްފައިވާ ފަރާތްތަކެއް ކަމަށެވެ. އަދި އެފަދަ ފަރާތްތަކަކީ ވަރަށް ބޮޑު ރިސްކުތަކެއް ނަގައިގެން މަސައްކަތް ކުރަމުންދާ ފަރާތްތަކެއް ކަމަށްވުމާއެކު، އެ އިސްލާހުގައި އިންވެސްޓަރުންނާއި ރިސޯޓް އޯނަރުންނާއި މުވައްޒަފުން ވެސް ހިމާޔަތްކުރަންޖެހޭ ކަމަށް ފަލާޙު ވަނީ ވިދާޅުވެފައެވެ.
މީގެއިތުރުން، ދައުލަތަށާއި ރައްޔިތުންނަށް އެންމެ ފައިދާހުރި ގޮތަކީ ހުރިހާ ފަރާތްތަކެއްގެ މަސްލަހަތަށް ރިއާޔަތްކޮށްގެން ގާނޫނަށް އިސްލާހުތައް ގެނައުންކަން ފާހަގަކުރައްވަމުން ފަލާޙު ވިދާޅުވީ، ސަރުކާރުން މަސައްކަތް ކުރަމުން ގެންދަނީ މިފަދަ ކަންކަމުގައި އިންސާފުވެރި އަދި އެއްވެސް ފަރާތަކަށް ގެއްލުން ނުވާނެ ގޮތަށް އިސްލާހުތައް ގެނައުމަށް ކަމަށެވެ.
