ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރުކަމުގެ ގޮނޑި ހުސްވެފައިވާ މި ދަނޑިވަޅުގައި އެ ދާއިރާގެ ބައި އިލެކްޝަންސްގައި ވާދަކުރާނެ ކެންޑިޑޭޓަކު ހޮވުމަށް ބާއްވާ ކޮންގްރެސް ޕާޓީގެ ޕްރައިމެރީ މި މަހުގެ 25 ވަނަ ދުވަހު ބޭއްވުމަށް އެ ޕާޓީން ހަމަޖައްސައިފިއެވެ.
މި އިންތިހާބު ކުރިއަށްދާނީ އެ ދުވަހުގެ ހެނދުނު 09:00 އިން ފެށިގެން ހަވީރު 16:00 އާއި ހަމައަށެވެ.
ކޮންގްރެސް ޕާޓީން ނެރެފައިވާ އިއުލާނެއްގައި ބުނީ، ޕްރައިމެރީގައި އެ ޕާޓީގެ މެންބަރުންނަށް ވޯޓުލުމުގެ ފުރުސަތު އޮންނާނީ ހިތަދޫ އުތުރު ދާއިރާގައާއި މާލޭ ސިޓީގައި ގާއިމުކޮށްފައިވާ ވޯޓު ފޮށިތަކަށް ކަމަށެވެ. އަދި މި އިންތިހާބުގައި ވޯޓުލުމުގެ އިންތިޒާމުތައް ހަމަޖެހިފައިވާ ގޮތުން، 2026 ވަނަ އަހަރުގެ ލޯކަލް ކައުންސިލްތަކުގެ އިންތިހާބުގައި ހިތަދޫ ދާއިރާއަށް ރަޖިސްޓްރީވެފައިވާ މެންބަރުން ވޯޓުލުމަށް ހަމަޖެހިފައިވަނީ ހިތަދޫގައި ބަހައްޓާފައިވާ ވޯޓު ފޮށިތަކަށެވެ.
މީގެ އިތުރުން މާލެއާއި އެހެނިހެން ރަށްރަށުގައި ވޯޓުލުމަށް ރަޖިސްޓްރީވެފައިވާ ހިތަދޫ އުތުރު ދާއިރާގެ މެންބަރުން ވޯޓުލުމަށް ހަމަޖެހިފައިވަނީ މާލޭ ސިޓީގައި ބަހައްޓާފައިވާ ވޯޓު ފޮށިތަކަށް ކަމަށް ވެސް ކޮންގްރެސް ޕާޓީން މައުލޫމާތުދެއެވެ.
ހުސްވެފައިވާ ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑިއަށް ޕީއެންސީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމެރީގައި ދެ ބޭފުޅަކު ވާދަކުރައްވައެވެ. އެ ދެ ބޭފުޅުންނަކީ މުޙައްމަދު ސިނާނު، ހުޅުދޫއާގެ / ސ. ހިތަދޫ އާއި އަޙްމަދު ސަޢީދު، ބަލީލް / ސ. ހިތަދޫއެވެ. މީގެ ތެރެއިން ސިނާނަކީ މިހާރު ހިނގަމުންދާ 20 ވަނަ މަޖިލީހުގައި އެ ދާއިރާގެ މެންބަރުކަން ކުރައްވާފައިވާ ބޭފުޅާއެވެ.
ހިތަދޫ އުތުރު ދާއިރާގެ ގޮނޑިއަށް އިދިކޮޅު އެމްޑީޕީގެ ފަރާތުން ވާދަކުރައްވާނީ އައްޑޫ ސިޓީގެ ކުރީގެ މޭޔަރު ޢަބްދުﷲ ޞާދިޤު (ސޯބެ) އެވެ. އެޕާޓީއިން އިތުރު މީހަކު މި ކަމަށް ޝައުޤުވެރިކަން ފާޅުކޮށްފައިނުވާތީ ސޯބެއަށް ޓިކެޓް ދީފައިވަނީ ޕްރައިމަރީއަކާ ނުލައެވެ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ސިނާނުގެ އަތުން ގެއްލިފައިވަނީ އޭނާއާއި، އިތުރު އެހެން މީހަކު ބައިވެރިވެގެން އިސްލާމިކް ބޭންކް މެދުވެރިކޮށް ނެގި 2.5 މިލިއަން ރުފިޔާގެ ލޯނު ދައްކަން 2024 ވަނަ އަހަރު ކޮށްފައިވާ ހުކުމަކާ އެއްގޮތަށް ފައިސާ ނުދެއްކުމުން ސްޕްރީމް ކޯޓުން ކުރި ހުކުމަކާ ގުޅިގެންނެވެ.
