ބޭންކް އޮފް މޯލްޑިވްސް (ބީއެމްއެލް) އިން ލޯނާއި ފައިނޭންސިންގ ދޫކުރާ އެންމެ މަތީ އުމުރަކީ 75 އަހަރު ކަމަށް ހަމަޖައްސައިފިއެވެ.
ބީއެމްއެލްއިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ލޯނާއި ފައިނޭންސިންގ ދޫކުރާ އުމުރުފުރާއަށް ބަދަލު ގެނައުމަށް ބީއެމްއެލްގެ ބޯޑުން އިއްޔެ ނިންމާފައިވާ ކަމަށާއި، އަދި އެ ނިންމުމަށް މިހާރު އަމަލުކުރަން ފަށާފައިވާ ކަމަށެވެ.
މީގެ ކުރިން ބީއެމްއެލްއިން ލޯނާއި ފައިނޭންސިންގ ދޫކުރާ އެންމެ މަތީ އުމުރުފުރާގެ ގޮތުގައި ކަނޑައަޅާފައި ވަނީ 60 އަހަރެވެ. ނަމަވެސް، އަލަށް މި ގެނެވުނު ބަދަލާއެކު، 18 އަހަރާއި 75 އަހަރާ ދެމެދުގެ ކޮންމެ ފަރާތަކަށް ވެސް ބޭންކުގެ ލޯނުތަކަށް އެދި ހުށަހެޅުމުގެ ފުރުސަތު މިހާރު ހުޅުވާލެވިފައިވާ ކަމަށް ޝަރީފް ވަނީ ވިދާޅުވެފައެވެ.
ޝަރީފް ވިދާޅުވި ގޮތުގައި، ކުރިން އޮތް އުސޫލުގެ ސަބަބުން އުމުރުން 55 އަހަރުގެ މީހަކަށް ލޯނެއް ލިބެނީ އެންމެ ފަސް އަހަރުގެ ތެރޭގައި ދައްކާ ހަލާސްކުރެވޭނަމައެވެ. އެހެންކަމުން، ލޯނު ދޫކުރާ އުމުރު 75 އަހަރަށް ބަދަލުކުރުމުން، ގެދޮރު ގަތުމާއި އެހެނިހެން ބޮޑެތި ލޯނާއި ފައިނޭންސިންގތަކަށް އެދުމުގައި ބޮޑެތި ލުއިތަކެއް ލިބިގެންދާނެ ކަމަށް ވެސް އޭނާ ވަނީ ވިދާޅުވެފައެވެ.
މި ބަދަލުގެ ސަބަބުން ލޯނު ދެއްކުމަށް އެކަށީގެންވާ މުއްދަތެއް ލިބި، މަހުން މަހަށް ދައްކަންޖެހޭ އަދަދު ކުޑަވެގެންދާނެކަން ވެސް އޭނާ ފާހަގަކުރެއްވިއެވެ.
