ޗައިނާގެ ސަންޔާގައި މިއަދު ފެށި ހަ ވަނަ އޭޝިއަން ބީޗް ގޭމްސްގައި ރާއްޖޭގެ ފިރިހެން ބީޗް ހޭންޑްބޯޅަ ޓީމުން ކުޅުނު ފުރަތަމަ މެޗުގައި ބަންގްލަދޭޝް ބަލިކޮށްފިއެވެ.
ބީޗް ހޭންޑްބޯޅަ ފިރިހެން އިވެންޓުގައި ރާއްޖެ ހިމެނެނީ ގްރޫޕް ބީގައި އޮމާން، ޕާކިސްތާން، ޖޯޑަން، ބަންގްލަދޭޝް، ތައިލެންޑް، ގަތަރު އަދި މޮންގޯލިއާއާ އެކުގައެވެ.
ރާއްޖެއިން ގްރޫޕް ސްޓޭޖުގައި ކުޅުނު ފުރަތަމަ މެޗު ޕެނަލްޓީ ޖަހައިގެން ބަންގްލަދޭޝްގެ މައްޗަށް ކުރި ހޯދީ 2-1 ގެ ނަތީޖާއަކުންނެވެ.
މެޗުގެ ފުރަތަމަ ސެޓު ކާމިޔާބުކުރީ ބަންގްލަދޭޝްއިންނެވެ. ދެވަނަ ސެޓު ރާއްޖެއިން ވަނީ ކާމިޔާބުކޮށްފައެވެ. އެ މެޗުގައި ރާއްޖޭގެ ފަތުހުﷲ އާދަމް ވަނީ މޮޅު ކުޅުމެއް ދައްކައި ގިނަ ގޯލުތަކެއް ޖަހައިފައެވެ.
މި މުބާރާތުގައި ރާއްޖެ ދެން ނުކުންނާނީ ޖޯޑަންއާ ދެކޮޅަށް މިއަދު ރާއްޖެ ގަޑިން މެންދުރުފަހު 2:00 ގައެވެ.
