ޣައްޒާގައި ޤާއިމުކޮށްފައިވާ މަލާމާތެއްފަދަ ’ސުލްޙައިގެ އެއްބަސްވުމާ‘ ޚިލާފަށް، އިޒްރޭލުގެ އަސްކަރިއްޔާއިން ޣައްޒާގެ އެތެރޭގައި ދާއިމީ އަސްކަރީ މަރުކަޒުތަކެއް ބިނާކުރަމުންދާކަން ސެޓެލައިޓް މަންޒަރުތަކުން ސާބިތުވެއްޖެއެވެ. މިއިން ދައްކުވައިދެނީ އިޒްރޭލުން ޣައްޒާއިން ފޭބުމުގެ އެއްވެސް ނިޔަތެއް ނެތްކަމާއި، މިއީ ޣައްޒާގެ ބިންތައް ދާއިމީކޮށް ފޭރިގަތުމަށް ހިންގާ ބޮޑު ޖަރީމާއެއްކަމެވެ.
މިނިވަން ތަޙުޤީޤީ އިދާރާތަކުން ދިރާސާކޮށްފައިވާ އެންމެ ފަހުގެ ސެޓެލައިޓް ފޮޓޯތަކުން ދައްކާގޮތުގައި، އިޒްރޭލުން ދަނީ ހަނގުރާމައިގެ ވަގުތީ ކޭމްޕުތަކުގެ ބަދަލުގައި، ކޮންކްރީޓުން ވަރުގަދަ ދާއިމީ މަރުކަޒުތައް ހަދަމުންނެވެ.
- ނެޓްޒަރިމް ކޮރިޑޯ: ޣައްޒާގެ އުތުރާއި ދެކުނު ވަކިކުރުމަށް އިޒްރޭލުން ބޭނުންކުރާ މި މަގު ވަނީ އިންތިހާއަށް ފުޅާކޮށްފައެވެ. ފޮޓޯތަކުން ފެންނަ ގޮތުގައި އެތަނުގައި ދަނީ ދާއިމީ ކޮންކްރީޓް ބިންގާތައް އަޅައި، އަސްކަރީ ޓޭންކުތަކަށް ޚާއްޞަ ބޮޑެތި މަގުތައް ހަދަމުންނެވެ.
- ބަފަރ ޒޯން ފުޅާކުރުން: ޣައްޒާގެ އުތުރުގައި އިޒްރޭލުން ކަނޑައަޅާފައިވާ ސަލާމަތީ ރޮނގު (”ޔެލޯ ލައިން“) ދަނީ ފަލަސްޠީނުގެ ދަނޑުބިންތަކުގެ ތެރެއަށް އިތުރަށް ފުޅާކުރަމުންނެވެ. އަދި އެ ސަރަޙައްދުގައި ހުރި އާންމުންގެ ގެދޮރު އެއްކޮށް ސުންނާފަތިކުރަމުންދާކަން ސެޓެލައިޓް ޑޭޓާއިން ކަށަވަރުވެއެވެ.
އަސްކަރީ މާހިރުން ބުނާގޮތުގައި، މި ފެންވަރަށް ކޮންކްރީޓްކޮށް، ދާއިމީ އިންފްރާސްޓްރަކްޗަރ ޤާއިމުކުރުމަކީ ވަގުތީ ސަލާމަތީ ފިޔަވަޅެއް ނޫނެވެ؛ މިއީ ސީދާ ބިން ފޭރިގަތުމެވެ (Annexation). އެމެރިކާއިން މެދުވެރިވެގެން ޣައްޒާ އާރާސްތުކުރުމުގެ ވާހަކަތައް ދައްކަމުން ދިޔަ ނަމަވެސް، މި ފޮޓޯތަކުން ސާބިތުވަނީ ދެކުނަށް ފަހައިލާފައިވާ އެތައް ލައްކަ ފަލަސްޠީނު ރައްޔިތުންނަށް އެމީހުންގެ ގެދޮރަށް އެނބުރި ދިއުމުގެ ފުރުޞަތު ދިނުމަށް އިޒްރޭލުން ބޭނުންނުވާކަމެވެ.
