ފެމެލީ ކޯޓަށް އިސް ގާޒީ ކަމަށް އަލްއުސްތާޒު އަބްދުﷲ ނަޝީދު އައްޔަނުކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފިއެވެ.
ޖޭއެސްސީން މިއަދު ކުރި އިއުލާނުގައި ބުނީ ފެމެލީ ކޯޓަށް އިސް ގާޒީއަކު ހޯދުމަށް ކުރި އިއުލާނުގެ ދަށުން ކުރިމަތިލެއްވި ބޭފުޅުންނާ އިންޓަވިއުކުރުމަށްފަހު އިސް ގާޒީ ކަމަށް އައްޔަންކުރުމަށް ކޮމިޝަނަށް ލަފާ އަރުވާފައިވަނީ އެ ކޯޓުގެ ގާޒީ ޢަބްދުﷲ ނަޝީދުގެ ނަންފުޅު ކަމަށެވެ.
ޖޭއެސްސީން ބުނީ ފެމެލީ ކޯޓަށް އިސް ގާޒީއަކަށް ނަޝީދު އައްޔަނުކުރަން ނިންމީ އެ ކޮމިޝަނުން މިއަދު ބޭއްވި ޖަލްސާގައި ކަމަށެވެ.
ގާޒީ ނަޝީދަކީ ރާއްޖޭގެ އިސްލާމިކް ޔުނިވަސިޓީން މާސްޓާ އޮފް ލޯ އަދި ކުއްލިއްޔަތުލް ދިރާސާތުލް އިސްލާމިއްޔާއިން ބެޗްލާ އޮފް ޝަރީއާ އެންޑް ލޯ ހާސިލް ކުރައްވާފައިވާ ބޭފުޅެކެވެ.
ޝަރުއީ ދާއިރާގައި 21 އަހަރަށްވުރެ ދިގުމުއްދަތަކަށް ހިދުމަތްކުރައްވާފައިވާ ނަޝީދު ވަނީ މީގެ ކުރިން ނ. މަނަދޫ މެޖިސްޓްރޭޓް ކޯޓުގެ އިސް މެޖިސްޓްރޭޓުކަމާއި ނ. ޖުޑީޝަލް ދާއިރާގެ ދާއިރާ އިސް މެޖިސްޓްރޭޓުކަމުގެ އިތުރުން ކްރިމިނަލް ކޯޓުގެ ގާޒީކަމުގެ އިތުރުން ފެމެލީ ކޯޓުގެ ގާޒީކަންވެސް ކުރައްވާފައެވެ.
