އިންޑިއާގެ ސިފައިންތަކެއް ރާއްޖޭގެ އިތުރު މަސްދޯންޏަކަށް އެރި މައްސަލަ ރިޕޯޓު ކޮށްފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
މިކަން ހާމަކޮށް އެމްއެންޑީއެފުން މިއަދު ބުނެފައިވަނީ މި މަހުގެ އެއްވަނަ ދުވަހުގެރޭ މާހޯރަ3 ނަމަކަށް ކިޔާ މަސްދޯނި ދަތުރު ކުރަމުން ދަނިކޮށް އިންޑިއާ ސިފައިން އެ ދޯންޏަށް އަރާފައިވާ ކަމަށެވެ.
އެގޮތުން މޮޅަދޫ ބޮޔާއި 3 މޭލު ހިސާބުން ރޭގަނޑު 12 ޖެހިއިރު އިންޑިޔާގެ މަނަވަރެއް ކައިރިކޮށް ދޯންޏައް އަރާ މަސްވެރިންނަށް ބިރު ދައްކާފައިވާ ކަމަށް އެމްއެންޑީއެފުން ބުންޏެވެ. މީގެ އިތުރުން އެމްއެންޑީއެފުން ބުނެފައިވަނީ މި މައްސަލަ ވަނީ ދޯނީގެ ވެރިފަރާތުން ރިޕޯޓްކޮށްފައި ކަމަށެވެ.
ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ އަސުރުމާ3 ނަމަކަށް ކިޔާ މަސްދޯންޏަށް އިންޑިއާގެ ދެ ކޯސްޓްގާޑް ކައިރިކޮށް ސިފައިން އަރާފައިވާ އިރު، އެ ދޯނީގައި ހަތިޔާރާއެކު ބޭރުގެ ސިފައިން ހަރަކާތްތެރިވާ މަންޒަރު ފެންނަ ވީޑިއޯއެއް އިއްޔެ ވަނީ ވައިރަލްވެފައެވެ.
މީގެ އިތުރުން މި މައްސަލައާ ގުޅިގެން ރާއްޖޭގެ ކަނޑުގެ ސެކިއުރިޓީ ވަރުގަދަކޮށް އުތުރުން ރާއްޖޭގެ ބޯޑަރު ސަރަހައްދުގައި ސިފައިން ވަނީ އިއްޔެ އިން ފެށިގެް ޕެޓްރޯލް ކުރަން ފަށާފައެވެ.
