ތިލަމާލެ ބްރިޖުގެ މަސައްކަތް އެކަށީގެންވާ ދުވެއްޔެއްގައި ކުރިއަށް ނުގޮސް، ލަސަވަމުންދިއުމަކީ އެކަމާ މެދު ސަރުކާރުން ނުހަނު ކަންބޮޑުވާކަމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. ބްރިޖުގެ މަސައްކަތް ނިންމުމަށް އެކި ފަހަރުމަތިން ކަނޑައެޅި ތާރީހުތައް ފަހަނައަޅައި ގޮސް މަސައްކަތް ނުނިމި ދިގުލައިގެންދާތީ، މަސައްކަތް ނިންމުމަށް ކަނޑައަޅާފައިވާ މުއްދަތު އިތުރުކޮށްދިނުމަށް ކޮންޓްރެކްޓަރުގެ ފަރާތުން ތަކުރާރުކޮށް އެދެމުންދާކަން އެމަނިކުފާނު ފާހަގަކުރެއްވިއެވެ.
”ސަރުކާރުން ކުރަންޖެހޭ ހުރިހާ ކަމެއް މިކަމުގައި ކުރަމުން މިދަނީ، މިހާރު އަނެއްކާ ވެސް އެ މުއްދަތު އިތުރުކޮށްދޭން އެދިއްޖެ، ވަރަށް ބޮޑަށް ބަލާފައި އެ މުއްދަތު ދީފިން، ކުރިން ވެސް ތާރީހް ދިން އެކަމަކު ދިމަލެއް ނުވި، މިހާރު 2027 އަށް ނިންމަން ކޮންޓްރެކްޓަރު ތާރީހް ދީފައިވަނީ،“ – ރައީސް މުޢިއްޒު ވިދާޅުވިއެވެ.
މާލެ، ވިލިމާލެ، ގުޅިފަޅު އަދި ތިލަފުށި ގުޅާލުމަށް ބިނާކުރާ 6.7 ކިލޯމީޓަރުގެ މި ބްރިޖަކީ އިންޑިއާ ސަރުކާރުގެ 100 މިލިއަން ޑޮލަރުގެ ހިލޭ އެހީއާއި 400 މިލިއަން ޑޮލަރުގެ ލައިން އޮފް ކްރެޑިޓްގެ އެހީގައި ކުރިއަށްގެންދާ ޖުމްލަ 500 މިލިއަން ޑޮލަރުގެ ބިޔަ މަޝްރޫއެކެވެ.
މި މަޝްރޫއު އެންމެ ފުރަތަމަ ނިންމުމަށް ތާވަލުކޮށްފައި އޮތީ ނިމިދިޔަ ސަރުކާރުގެ ދައުރުގެ ތެރޭގައެވެ. ނަމަވެސް، އެކި ސަބަބުތަކާ ހުރެ މަސައްކަތް ލަސްވުމާ ގުޅިގެން، ކޮންޓްރެކްޓަރުގެ އެދުމުގެ މަތިން މިހާރު ވަނީ މަސައްކަތުގެ މުއްދަތަށް 30 މަސްދުވަސް އިތުރުކޮށްދީފައެވެ. މިގޮތަށް މުއްދަތު އިތުރުކުރުމުގެ ސަބަބުން، ކުންފުންޏަށް 100 މިލިއަން ރުފިޔާއަށްވުރެ ގިނަ ރުފިޔާ ހަރަދުވާނެ ކަމަށް ވަނީ ލަފާކުރެވިފައެވެ.
ތިލަމާލެ ބްރިޖްގެ މަސައްކަތް ކުރަމުން އަންނަނީ އިންޑިއާގެ ކޮންސްޓްރަކްޝަން ކުންފުންޏެއް ކަމަށްވާ އެފްކޮންސް އިންނެވެ. ތިލަމާލެ ބްރިޖްގެ މަސައްކަތް އެ ކުންފުންޏާ ހަވާލުކޮށްފައިވަނީ މީގެ ފަސް އަހަރު ކުރިން 2021 ވަނަ އަހަރުގެ ތެރޭގައެވެ.
