މޯލްޑިވްސް 2.0 އިނީޝިއޭޓިވްގެ ދަށުން ރާއްޖެ ޑިޖިޓަލައިޒް ކުރުމަށް ކުރާ މަސައްކަތުގެ ތެރެއިން، އާޓިފިޝަލް އިންޓެލިޖެންސް (އޭއައި) އާ ބެހޭ ޚާއްޞަ ބިލެއް ވަރަށް އަވަހަށް ރައްޔިތުންގެ މަޖިލީހަށް ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ މިއަދު ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، އޭއައިގެ ސަބަބުން ކުރިމަތިވާ ގޮންޖެހުންތަކާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.
މި ބައްދަލުވުމުގައި ނޫސްވެރިއަކު ކުރި ސުވާލެއްގައި، އޭއައިގެ ބޭނުން ނުހަމަގޮތުގައި ހިފައި، މީހުންނަށް ގަނާކޮށް ފުރައްސާރަކުރުމަށް މަގުފަހިވާ ގޮތަށް ކަންކަން ހިނގަމުންދާކަން ފާހަގަކުރިއެވެ. އަދި ޓެކްނޮލޮޖީގެ ގޮތުން ރާއްޖެ ކުރިއަށްދާއިރު، މިފަދަ ނޭދެވޭ ކަންކަން ހުއްޓުވުމަށް އޭއައި ކޮންޓްރޯލްކުރާނެ ގާނޫނީ އޮނިގަނޑެއް އެކުލަވާލުމަށް ސަރުކާރުން ކުރަމުންދާ މަސައްކަތަކީ ކޮބައިތޯ ނޫސްވެރިޔާ ސުވާލުކުރިއެވެ.
ނޫސްވެރިޔާގެ ސުވާލަށް ޖަވާބުދެއްވަމުން ރައީސް މުޢިއްޒު ވިދާޅުވީ، މޯލްޑިވްސް 2.0 ގެ ދަށުން ތިން ބިލެއް މިހާރު ހިނގަމުންދާ ދައުރުގައި މަޖިލީހަށް ހުށަހެޅުމަށް ތައްޔާރުވަމުންދާ ކަމަށެވެ. މީގެ ތެރޭގައި އޭއައިއާ ބެހޭ ބިލެއްވެސް ހިމެނޭނެ ކަމަށް ރައީސް ވިދާޅުވިއެވެ.
”ވަރަށް އަވަހަށް އޭއައި ބިލެއްވެސް މަޖިލީހަށް ހުށަހަޅާނަން. އެއީ ވަކި ބިލެއްގެ ގޮތުގައި ނޫނީ މިހާރު ތައްޔާރުކުރާ ބިލުތަކުގެ ތެރޭގައި ހިމަނައިގެން ނަމަވެސް، މަޖިލީހަށް އެ ބިލު ވަރަށް އަވަހަށް ދާނެ. އެއީ ކޮންމެގޮތެއްވިޔަސް ޑިޖިޓަލައިޒޭޝަންގެ ތެރެއަށް ދާއިރުގަ ސަފުގަ އެންމެ ކުރީގަ އަޅުގަނޑުމެން ތިބޭކަމުގަ ވާނަމަ އެމްބްރޭސް ކުރަން ޖެހޭނެ ކަމެއް. އޭއައި އެމްބްރޭސް ކުރާއިރުގަ އޭއައިއަކީ ގާނޫނީ ނިޒާމެއްގެ ތެރެއަށް ވަދެގެންދާ ރެގިއުލޭޓް ކުރެވޭ ނުވަތަ އެއާގުޅޭ ކަންކަން ބަޔާންކުރެވިފައި ހުންނަ ކަމަކަށް ވާންޖެހޭ“ ރައީސް ވިދާޅުވިއެވެ.
ރައީސް އިތުރަށް ވިދާޅުވީ ޑިޖިޓަލައިޒޭޝަންގެ ސަފުގައި ރާއްޖެ އެންމެ ކުރީގައި އޮންނަން ބޭނުންވާނަމަ، އޭއައި ފަދަ ޒަމާނީ ޓެކްނޮލޮޖީތައް ބަލައިގަންނަންޖެހޭނެ ކަމަށެވެ. ނަމަވެސް، އެފަދަ ޓެކްނޮލޮޖީތައް ބޭނުންކުރަންވާނީ ޤާނޫނީ ނިޒާމެއްގެ ތެރެއިން ރެގިއުލޭޓް ކުރެވިގެން ކަމަށާއި، އޭއައިއާ ގުޅޭ ކަންކަން ބަޔާންކުރެވިފައި އޮތުމަކީ މުހިންމު ކަމެއް ކަމަށްވެސް އެމަނިކުފާނު ފާހަގަކުރެއްވިއެވެ.
މި ސަރުކާރުން ރާއްޖޭގެ ޤާނޫނީ އޮނިގަނޑު ޒަމާނީ ޓެކްނޮލޮޖީއަށް ފައްކާކޮށް، އޭގެ ނޭދެވޭ އަސަރުތަކުން ރައްޔިތުން ރައްކާތެރިކުރުމަށް ގިނަ މަސައްކަތްތަކެއް ކުރަމުންދާކަން ފާހަގަކޮށްލެވެއެވެ. އެހެންކަމުން މި މަސައްކަތުގައިވެސް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ގެ އިރުޝާދުގެ ދަށުން މަޖިލީހުންވެސް ބޭނުންވާ އެއްބާރުލުން ލިބިގެންދާނެ ކަމަށް ބެލެވެއެވެ.
