11 އަހަރުގެ އަންހެން ކުއްޖަކާއެކު ޖިންސީ އަމަލު ހިންގި މައްސަލައެއްގައި ދައުވާ އުފުލާފައިވާ މީހެއްގެ މައްޗަށް ކުށް ސާބިތުވެ، އޭނާ 16 އަހަރަށް ޖަލަށް ލުމަށް ކޯޓުން ހުކުމް ކޮށްފިއެވެ.
ދިވެހި ފުލުހުންގެ ޚިދުމަތުން ތަހުގީގުކުރި މި މައްސަލައިގައި ދައުވާ އުފުލާފައިވަނީ މާލެ، މ. މުނިޔާގެ، މުޙައްމަދު އަނިލް (47އ) ގެ މައްޗަށެވެ. އޭނާގެ މައްޗަށް ދައުވާ އުފުލާފައިވަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު (ގާނޫނު ނަންބަރު 12/2009) ގެ ދަށުންނެވެ.
މި ހާދިސާ ފުލުހުންނަށް ހުށަހެޅުމާއެކު، ފުލުހުން ވަނީ ވަގުތުން އެ މައްސަލައިގެ ތަހުގީގު ފަށާފައެވެ. ތަހުގީގު ނިންމުމަށްފަހު ފުލުހުން މި މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވުމުން، އެ އޮފީހުން ވަނީ ކޯޓަށް މައްސަލަ ހުށަހަޅައި ދައުވާ އުފުލާފައެވެ.
މި މައްސަލައިގައި ހުށަހެޅުނު ހެކިތަކަށާއި ގާނޫނީ ބަހުސްތަކަށް ބެލުމަށްފަހު، 15 އެޕްރީލް 2026 ގައި ކޯޓުން ވަނީ މުޙައްމަދު އަނިލްގެ މައްޗަށް ހުކުމް އިއްވާފައެވެ. ކޯޓުގެ ހުކުމުގައިވަނީ މި ކުށުގެ އުގޫބާތެއްގެ ގޮތުން އޭނާ 16 އަހަރަށް ޖަލަށްލުމަށެވެ. ނަމަވެސް، ޖިނާއީ އިޖުރާއަތުގެ ގާނޫނުގެ 186 ވަނަ މާއްދާގެ ދަށުން، މި މައްސަލައާ ގުޅިގެން އޭނާ ބަންދުގައި ހުރި 4 މަހާއި 19 ދުވަސް ހުކުމުގެ މުއްދަތުން އުނިކުރުމަށް ކޯޓުން ވަނީ ނިންމާފައެވެ. އެހެންކަމުން، އަނިލް ތަންފީޒުކުރަންޖެހޭ އަދަބަކީ 15 އަހަރާއި 7 މަހާއި 11 ދުވަހުގެ ޖަލު ހުކުމެކެވެ.
މި މައްސަލައަކީ ކުޑަކުދިންނަށް ޖިންސީ ގޯނާކުރުމުގެ މައްސަލަތައް ހުއްޓުވައި، ކުށްވެރިން އިންސާފުގެ ކުރިމައްޗަށް ގެނައުމަށް ދިވެހި ފުލުހުން ކުރަމުންދާ މަސައްކަތުގެ ތެރެއިން ލިބުނު ކާމިޔާބީއެއްގެ ގޮތުގައި ފުލުހުން ފާހަގަކުރެއެވެ.
ދިވެހި ފުލުހުންގެ ޚިދުމަތުން ބުނީ، ކުޑަކުދިންނަށް ރައްކާތެރި މާހައުލެއް ގާއިމުކޮށްދިނުމަށާއި، ކުޑަކުދިންނަށް ޖިންސީގޯނާކޮށް އިހުމާލުވާ ފަރާތްތަކުގެ މައްސަލަތައް ތަހުގީގުކޮށް، މިފަދަ ނުރައްކާތަކުން ކުޑަކުދިން ރައްކާތެރިކުރުމަށް ކުރަންޖެހޭ މަސައްކަތްތައް ފަސްޖެހުމެއްނެތި ކުރަމުން ގެންދާނެ ކަމަށެވެ.
