ފަތުރުވެރިކަމުގެ ބިމު ކުލީގެ ގޮތުގައި މި ހިނގާ 2026 ވަނަ އަހަރުގެ ފުރަތަމަ ތިން މަސްދުވަހު ދައުލަތަށް 500 މިލިއަނަށްވުރެ ގިނަ ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮޓޯރިޓީ (މީރާ) ގެ ތަފާސްހިސާބުތަކުން ދައްކައިފިއެވެ.
މީރާގެ ތަފާސްހިސާބުތަކުން ދައްކާގޮތުގައި މި އަހަރުގެ ފުރަތަމަ ތިން މަސްދުވަހު ފަތުރުވެރިކަމުގެ ބިމު ކުލީގެ ގޮތުގައި ދައުލަތަށް 549 މިލިއަން ރުފިޔާ ލިބިފައިވެއެވެ. މިއީ މިދިޔަ 2025 ވަނަ އަހަރުގެ މި މުއްދަތުގައި ލިބުނު 488 މިލިއަން ރުފިޔާއާ އަޅާބަލާއިރު 12.5 އިންސައްތައިގެ ކުރިއެރުމެކެވެ.
މި މުއްދަތުގެ ތެރޭގައި ރިސޯޓް ބިމު ކުލީގެ ގޮތުގައި ލިބުނު 35 މިލިއަން ޑޮލަރު ލިބިފައިވެއެވެ. މިއީ މިދިޔަ އަހަރު ލިބުނު 32 މިލިއަން ޑޮލަރަށްވުރެ އިތުރު އަދަދެކެވެ. މީގެ އިތުރުން ރިސޯޓް ކުލީގެ ގޮތުގައި ދައުލަތަށް 440 މިލިއަން ރުފިޔާ މި މުއްދަތުގެ ތެރޭގައި ލިބިފައިވެއެވެ. މިއީ ދައުލަތަށް ލިބުނު ޖުމުލަ އާމްދަނީގެ 10.9 އިންސައްތައެވެ. ހަމައެހެންމެ ރިސޯޓު ކުލީގެ ގޮތުގައި 29 މިލިއަން ޑޮލަރު ވަނީ ލިބިފައެވެ. މިއީ ޑޮލަރު އާމްދަނީގެ 14 އިންސައްތައެވެ.
މިނިސްޓްރީގެ ތަފާސްހިސާބުތަކުން ދައްކާ ގޮތުގައި، މިވަގުތު ރާއްޖޭގައި ފަތުރުވެރިކަމުގެ ހިދުމަތް ދޭ 1,303 ތަނެއް ހުރިއިރު، މީގެ ތެރޭގައި 180 ރިސޯޓް ހިމެނެއެވެ. މި ތަންތަނުގެ ޖުމްލަ އެނދުގެ އަދަދަކީ 45,111 އެވެ.
މީގެއިތުރުން، ފަތުރުވެރިކަމުގެ ސިނާއަތަށް ލިބިފައިވާ ކުރިއެރުމަށް ބަލައިލާއިރު، މި އަހަރުގެ މިހާތަނަށް ހަތް ލައްކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އެގޮތުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންކަން ފާހަގަކޮށްލެވެއެވެ.
