މާލޭ ސިޓީ ކައުންސިލަށް އަލަށް އިންތިހާބުވި އެމްޑީޕީ ކެންޑިޑޭޓުންގެ ފަރާތުން ފެނިގެންދަނީ ދީނީ މިންގަނޑުން ބޭރު، އަހްލާގީ ފެންވަރުދަށް އަމަލުތަކެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގައި ކޮންގްރެސް ޕާޓީއަށް ލިބުނު ކާމިޔާބީ ފާހަގަކުރުމުގެ ގޮތުން އއ. ރަސްދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، ރައްޔިތުން އިންތިހާބު ކުރާ މަގާމުތަކަށް އަންނަ މީހުންގެ ފަރާތުން ރިވެތި އަހްލާގު ފެންނަން ކޮންމެ ރައްޔިތުން އެދޭނެ ކަމަށެވެ. ނަމަވެސް އެފަދަ ބައެއް މީހުންގެ ފަރާތުން އެކަން ފެނިގެން ނުދިއުމަކީ ވަރަށް ބޮޑަށް ހިތާމަފުޅުކުރައްވާ ކަމެއް ކަމުގައި އެމަނިކުފާނު ވަނީ ވިދާޅުވެފައެވެ.
އެފަދަ މީހުންގެ ފަރާތުން މިހާ އަވަހަށް ހަޑިހުތުރު ބަސްތަކުން މުހާތަބުކުރުމާއި، ގައުމުގެ ހަމަޖެހުން ނަގާލުމަށް މަސައްކަތް ކުރާ ތަން ފެންނަން ފަށާފައިވާކަން ފާހަގަކުރައްވަމުން ރައީސް ވިދާޅުވީ، ކޮންމެ ރެއަކު އެ ފަރާތްތަކުން ކުރިއަށްގެންދާ އެއްވުންތަކުގައި މިކަންކަން ތަކުރާރު ކުރަމުން ގެންދާ ކަމަށެވެ. އެފަދަ މީހުންގެ ފަރާތުން ރިވެތި ސިފަތައް ނުފެންނަތާންގައި ދީނެއް އަދި މިއްލަތެއް އިސްކުރާ މަންޒަރު ވެސް ނުފެންނަ ކަމަށް އެމަނިކުފާނު ވަނީ ވިިދާޅުވެފައެވެ.
”އަޅުގަނޑުމެން އިސްކުރަން ޖެހޭނީ ގައުމު. ގައުމު އިސްކުރުމުގެ މާނައަކީ އަޅުގަނޑުމެންގެ ދަރިންގެ މުސްތަގުބަލަށްޓަކައި މި ގައުމު އަޅުގަނޑުމެން ވާރުތަކޮށްދޭން ޖެހޭނީ މާތްވެގެންވާ އިސްލާމްދީނުގެ ހަމަތަކުގެ މަތީގައި ހިނގާ ގައުމަކަށް،“ – ރައީސް މުޢިއްޒު ވިދާޅުވިއެވެ.
ރައީސް މުޢިއްޒު ވިދާޅުވީ، ކައުންސިލްތަކަށް ހޮވިގެން ދިޔަ ޕީއެންސީގެ ފިކުރާއި ދެކޮޅު ކެންޑިޑޭޓުންގެ ކިބައިން ވެސް ފެނިގެންދާންވާނީ އެ މީހުންގެ ސިޔާސީ ޕާޓީގެ އެޖެންޑާ އިސްކުރުމަށް ވުރެ ގައުމުގެ މަސްލަހަތު އިސްކުރުން ކަމަށެވެ. ކޮންމެ ސިޔާސީ ފިކުރަކުން ހޮވުނު މީހެއް ކަމުގައި ވިޔަސް އެމީހާ ހޮވޭ ހިސާބުން އެއީ ހުރިހާ ރައްޔިތުންނަށް ހިދުމަތްކުރުމުގައި ދެމިހުންނަންޖެހޭ މީހެއް ކަމަށް ވެސް އެމަނިކުފާނު ވަނީ އިތުރަށް ވިދާޅުވެފައެވެ.
