މިއަދު ބޭއްވުނު ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގެ އިތުރު ބުރުގައި ޕީއެންސީއަށް ފާހަގަކޮށްލެވޭ ކާމިޔާބީއެއް ލިބިއްޖެއެވެ.
މި އިންތިހާބުގެ އިތުރު ބުރެއް ބާއްވާފައިމިވަނި، މި މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގައި ވާދަކުރި ކެންޑިޑޭޓުންނަށް ލިބުނު ވޯޓު އެއްވަރުވުމާ ގުޅިގެންނެވެ. އެގޮތުން މިއަދު ނެގުނު ވޯޓުގައި ތިން ރަށެއްގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ގޮނޑިތައް ވަނީ ޕީއެންސީން ކާމިޔާބުކޮށްފައެވެ.
އެ ތިން ރަށަކީ، ހދ. ނޭކުރެންދޫ، ހއ. ކެލާގެ އިތުރުން ލ. މާވަށެވެ.
މި އިންތިހާބުގައި ޕީއެންސީގެ ފަރާތުން ނޭކުރެންދޫގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރު ކަމުގެ ގޮނޑިއަށް ވާދަކުރި ކެންޑިޑޭޓް ފާޠިމަތު ރިއުޒާ ކާމިޔާބުކޮށްފައެވެ. އޭނާއާއިއެކު މި އިންތިހާބުގައި ދެން ވާދަކުރީ އަމިއްލަ ގޮތުން ވާދަކުރި ކެންޑިޑޭޓް ފާތިމަތު ނިޝާދާއެވެ.
މީގެ އިތުރުން ހއ. ކެލާގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ރައީސާގެ ގޮނޑި ކާމިޔާބުކޮށްފައިވަނީ ޕީއެންސީގެ ފަރާތުން ވާދަކުި ކެންޑިޑޭޓް ޙައްވާ ފަޒްނާއެވެ. އަދި ލ. މާވަށު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރު ކަމުގެ ގޮނޑި ކާމިޔާބުކޮށްފައިވަނީ ޕީއެންސީގެ ކެންޑިޑޭޓް ފާޠިމަތު ޝާފިއާއެވެ.
މިއަދު ބޭއްވުނު ލޯކަލް ކައުންސިލްތަކުގެ އިންހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބަކީ މި މަހުގެ ހަތަރު ވަނަ ދުވަހު ބޭއްވުނު އިންތިހާބުގައި ވާދަކުރި ކެންޑިޑޭޓުންގެ ވޯޓު އެއްވަރުވުމާ ގުޅިގެން، ނަތީޖާ ކަށަވަރު ކުރުމަށްޓަކައި ބޭއްވުނު އިތުރު ބުރެކެވެ. މި އިންތިހާބުގައި ވޯޓުލުމަށް ޖުމުލަ 6،093 މީހަކު ވަނީ ރަޖިސްޓްރީވެފައެވެ.
