ސަރުކާރުގެ ސިޔާސީ މަގާމުތަކަކީ ހަދިޔާއެއްގެ ގޮތުގައި ދެވޭ އެއްޗެއް ނޫން ކަމަށާއި، މަސައްކަތުގެ ފެންވަރު ދަށްނަމަ އެ މަގާމުތަކުން ޖެހޭނީ ވަކިވާންކަމަށް ރައީސުލްޖުމްހޫރިއްޔާގެ އޮފީހުގެ ޗީފް ގަވަމަންޓް ސްޕޯކްސްޕާސަން މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
ދައުލަތުގެ މީޑިއާގެ ”ރާއްޖެ މިއަދު“ ޕްރޮގްރާމުގައި ވާހަކަދައްކަވަމުން މުންދު ވިދާޅުވީ، ސިޔާސީ މަގާމުތަކަކީ ވަކި ސިޔާސީ ފިކުރެއްގެ ތެރެއިން ދެވޭ މަގާމުތަކެއް ކަމަށާއި، އެ މަގާމުތަކުގައި ތިއްބަވާ ބޭފުޅުންގެ މައިގަނޑު މަސްއޫލިއްޔަތަކީ ސަރުކާރަށާއި ރައީސުލްޖުމްހޫރިއްޔާއަކަށް ހުންނަވާ ބޭފުޅަކަށް ވަފާތެރިކަމާއެކު، އިތުބާރު ހުރި ގޮތެއްގައި މަސައްކަތްކޮށްދެއްވުން ކަމަށެވެ.
ސިޔާސީ މަގާމުތަކުގައި ތިއްބަވާ ބޭފުޅުންގެ ފަރާތުން ފެންނަންޖެހޭ އިތުބާރަކީ ނުހަނު މުހިންމު ކަމެއްކަން ފާހަގަކުރައްވައި، މުންދު ވިދާޅުވީ، އެ މަގާމުތަކަކީ ހަދިޔާއެއްގެ ގޮތުގައި ލިބޭ އެއްޗެއް ނޫން ކަމަށެވެ. މަގާމުގެ ހުވާކޮށް، އައްޔަންކުރި ކަމުގެ ލިޔުން ލިބުނު ކަމުގައި ވިޔަސް، އެ ބޭފުޅުންނަށް މުސާރަ ދެނީ ރައްޔިތުންގެ ފައިސާއިން ކަމަށްވާތީ، އެ ބޭފުޅުން ވާނީ ރައްޔިތުންގެ ހާދިމުންނަށް ކަމަށް އޭނާ ވިދާޅުވިއެވެ.
ކަން މިހެން އޮތްއިރު މަސައްކަތުގެ ފެންވަރު ނުދެއްކިގެން މަގާމުން ވަކިކުރަން ޖެހިއްޖެ ހާލަތެއްގައި، އެކަމާ މެދު ޝަކުވާ ކުރުމުގެ އެއްވެސް ޖާގައެއް ނޯންނާނެ ކަމަށް ވެސް މުންދު ވަނީ ވިދާޅުވެފައެވެ.
”އަޅުގަނޑު ހިމެނޭ ގޮތަށް އަޅުގަނޑުމެން އެއްވެސް މީހަކަށް ލިބޭ ހަދިޔާއެއް ނޫން މިއީކީ، އަޅުގަނޑު ގަބޫލެއް ނުކުރަން އަޅުގަނޑުގެ ވަޒީފާއަކީ އަޅުގަނޑަށް ސިޔާސީ ގޮތުން އަޅުގަނޑުގެ ޕާޓީއަށް ވަފާތެރިވީތީ އަޅުގަނޑަށް ލިބިފައިވާ ހަދިޔާއެއް ކަމަކަށް، ޕާފޯމަންސް ނުދެއްކޭ ކަމަށް ވެއްޖިއްޔާ އަޅުގަނޑު ނުކުމެގެން ދާންޖެހޭ ހާލަތެއް އަންނައިރު އަޅުގަނޑު ޝަކުވާއެއް ކޮށްގެން ނުވާނެ،“ – މުންދު ވިދާޅުވިއެވެ.
ސަރުކާރުގެ ސިޔާސީ މަގާމުތަކުގައި ތިބޭ މުވައްޒަފުންގެ މަސައްކަތުގެ ފެންވަރު ވަޒަންކުރުމަކީ ސަރުކާރުން މީގެ އަހަރެއްހައި ދުވަސް ކުރިން ފެށިގެން ކުރަމުން އަންނަ މަސައްކަތެއްކަން ފާހަގަކުރައްވަމުން މުންދު ވިދާޅުވީ މިހާރު ވެސް އެ މަސައްކަތް އެއްވެސް ހުއްޓުމެއް ނެތި ކުރިއަށްދާ ކަމަށެވެ.
މުންދު އިތުރަށް ވިދާޅުވީ، މިއީ ވަކި އަދަދަކަށް މުވައްޒަފުން މަދުކުރުމަށް ނުވަތަ ހަމައެކަނި މާލީ ވިސްނުމެއްގައި ކުރާކަމެއްނޫން ކަމަށާއި، މިއީ ސިޔާސީ މުވައްޒަފުންގެ މަސައްކަތުގެ ފެންވަރު ދެނެގަތުމަށް ކަނޑައަޅާފައިވާ ސިޔާސަތުގެ ތެރެއިން ކުރިއަށްދާ މަސައްކަތެއް ކަމަށެވެ. އެގޮތުން ސަރުކާރުގެ ހުރިހާ މިނިސްޓްރީތަކާއި އިދާރާތަކެއްގައި ވެސް އެ މަސައްކަތް ކުރިއަށްދާކަން އޭނާ ފާހަގަކުރެއްވިއެވެ.
