މިއަދު ހުކުރުވަގުތު ރާއްޖޭގެ އުތުރުގެ ރަށެއްގައި ގަހެއްގައި ކުޑަކުއްޖަކު ދެއަތް ފުރަގަހަށް ލާފައި، ގަހެއްގައި ބަނދެ ޖިސްމާނީ އަނިޔާ ދިން މައްސަލައެއް ދިވެހި ފުލުހުންގެ ޚިދުމަތާއި ކަމާއިގުޅުންހުރި އިދާރާތަކުން ބަލަން ފަށައިފިއެވެ.
ފުލުހުން ބުނީ، އުތުރުގައި ހިމެނޭ ރަށެއްގައި އުމުރުން 8 އަހަރުގެ އަންހެން ކުއްޖަކު ގަހެއްގައި ބަނދެ އެ ކުއްޖާއަށް ޖިސްމާނީ އަދި ނަފްސާނީ އަނިޔާ ލިބި ކަރާމާތަށް އުނިކަން އަންނާނެފަދަ އަމަލެއް ހިންގި މައްސަލައެއް ފުލުހުންނަށް ރިޕޯޓްކޮށްފައިވަނީ ،2026 އޭޕްރީލް 17 ވަނަ ދުވަހުގެ 13:10 އެހައިކަންހާއިރު ކަމަށެވެ.
މި ހާދިސާގެ މައުލޫމާތު އާންމުވެފައިވަނީ ސޯޝަލް މީޑިއާގައި ދައުރުވާން ފެށި ވީޑިއޯއަކާ ގުޅިގެންނެވެ. އެ ވީޑިއޯއިން ފެންނަ ގޮތުގައި އެ ކުޑަ އަންހެން ކުއްޖާވަނީ އަތް ބަނދެ ގަހަކާލައިފައެވެ. އަދި ސަލާމަތްވުމަށް އެ ކުއްޖާ ނުހަނު މަސައްކަތްކުރާ މަންޒަރުވެސް އެ ވީޑިއޯއިން ފެނެއެވެ. ފުލުހުންނާއި ކަމާބެހޭ އެހެނިހެން އިދާރާތަކުން ގުޅިގެން މިހާރު ދަނީ އެ ކުއްޖާގެ ރައްކާތެރިކަން ކަށަވަރުކުރުމަށްޓަކައި އަޅަންޖެހޭ އެންމެހައި ފިޔަވަޅުތައް އަޅަމުންނެވެ. އަދި މައްސަލައާ ގުޅިގެން، ކުއްޖާގެ ރައްކާތެރިކަން ކަށަވަރުކުރުމާއި ތަހުގީގުގެ ތެރެއިން ފުރިހަމަކުރަންޖެހޭ އެންމެހައި ކަންކަން ފުރިހަމަ ކުރުމުގެ މަސައްކަތް ކަމާބެހޭ އިދާރާތަކާ ގުޅިގެން ފުލުހުން ދަނީ ކުރަމުން ކަމަށް ވަނީ ބުނެފައެވެ.
